اسلام آباد۔4اپریل (اے پی پی):پاکستان ءَ امریکی ناظم الامور نیتالی بیکر ءَ پٹرولیم ءِ بنجاھی وزیر علی پرویز ملک ءَ گوں گند ءُ نند کتگ۔ گند ءُ نند ءَ دو نیمگی توانائی ءِ کمک، پائیدار دیمروئی، ءُ پاک امریکہ ءِ سیادی ءِ دیمروئی ءِ بابت ءَ گپ ءُ تران کنگ بوت۔ پٹرولیم ڈویژن ءِ جارکش ءِ نیمگ ءَ جاڑی بوتگیں بیان ءِ رد ءَ گند ءُ نند ءَ امریکہ ءُ پاکستان ءِ توانائی ءِ شریکداری ءِ سر ءَ دلگوشی دیگ بوتگ ایشی ءِ تہ ءَ قابل تجدید توانائی ءِ منصوبگ، معدنیات، ہائیڈروکاربن ءُ انفراسٹرکچر ءِ سرمایہ کاری، کلیدی توانائی ءِ چیلنج، ٹیکنالوجی ءِ نوکیں چیز ءُ پاکستان ءِ گیش بوھوکیں توانائی ءِ ضلورت ءَ را پیلو کنگ ءِ واستہ پالیسی ءِ گامگیج ھوار اَنت۔ ایشی ءَ ابید دوئیں رہشون آنی تہ ءَ توانائی ءِ شوبگ ءِ برجائی ءِ واستہ وت مہ وتی پائدگ مندیں شراکت داری ءُ آیوکیں وھد ءِ روڈ میپ آنی سر ءَ ھم تران کت۔ اے موہ ءِ سر ءَ بنجاھی وزیر علی پرویز ملک ءَ امریکی حکومت ءِ برجاھیں کمک ءَ را وش اتک کت ءُ گوشت کہ پاکستان امریکہ ءِ گوما وتی اسٹریٹجک سیادی ءَ را ارزشت دنت ءُ لوٹ ایت کہ اے سیادی ءَ را دیمروئی شریک ءِ بستار ءَ دیمروئی دیگ بہ بیت۔ ما تیل، گیس ءُ قابل تجدید توانائی ءِ شوبگ ءَ یکجائی منصوبگ آناں پٹ ءُ پول کنگ ءِ واھشت مند ایں تانکہ الس ءِ واستہ پائیدار دیمروئی ءُ ارزانیں توانائی ءَ را دل یکیمی کنگ بہ بیت۔ بنجاھی وزیر ءَ امریکی چارج ڈی افیئرز ءِ منت گپت کہ آئی ءَ آیوکیں ہفتگ ءَ برجم دارگ بوھوکیں پاکستان معدنیات سرمایہ کاری فورم ءَ مزنیں تک ءِ امریکی ڈل ءِ بھر زوری ءِ واستہ ذاتی رنگ ءَ آسراتی داتگ۔ فورم ءِ تہ ءَ جنوبی ءُ میاں اوستمانی ایشیا ءِ قائم مقام اسسٹنٹ سیکرٹری اسٹیٹ ایرک مائر ءَ بھر زوری کنگ بیت کہ ایشی ءِ تہ ءَ بازیں وھد ءَ پد اسٹیٹ ڈیپارٹمنٹ ءِ اسسٹنٹ سیکرٹری ءِ تک ءِ کارندہ ءِ یک مزنیں تر ءُ تابے بیت۔ نیٹلی بیکر ءَ پاکستان ءِ اقتصادی برجائی ءُ ھاسیں اصلاحات ءِ سوبمندیں رنگ ءَ عمل کنگ ءِ توسیپ کت۔ آئی ئَ مزن وزیر شہباز شریف ئُُ آئی ئِ کابینہ ئَ را اے کامیابی ئِ مبارک بات دات۔ آئی ءَ گوشت کہ امریکہ ءَ پاکستان ءِ گوما ایمنی ءِ شوبگ ءَ جوانیں کمک برجاہ انت۔ امریکی صدر ڈونلڈ ٹرمپ ءَ وتی اولی گشتانک ءِ تہ ءَ مزن وزیر شہباز شریف ءِ سروکی ءَ پاکستان ءِ ایمنی ءِ کوشست آنی توسیپ کتگ ۔ نوں اے سیادی ءَ را گیش ءُ گیوار کنگ ءُ نوکیں پڑ ءَ سر کنگ ءِ وھد اِنت۔ آئی ءَ مزن وزیر شہباز شریف ءِ سروکی ءَ اصلاحات ءِ راہ ءِ سر ءَ پاکستان ءَ را سرجمی ءَ کمک ءِ دل یکیمی دات۔ گند ءُ نند ءِ ساھت ءَ دوئیں رہشون آں وت مہ وتی توانائی ءِ مول ءُ مراد آناں دیم ءَ برگ ءُ پاک امریکہ ءِ کمک ءِ نوکیں راہ آنی شوھازگ ءِ واستہ یکجائی عزم ءِ ھم درشان کت۔
