بیلاروس۔3اپریل (اے پی پی):وفاقی وزیر مواصلات عبدالعلیم خان بیلاروس ءِ دو روچی تر ءُ تاب ءِ ھاتر ءَ منسک ءَ سر بوتگ ءُ اودا آئی ءَ وزارتی دیوان ءَ بہر زرتگ۔ وفاقی وزیر عبدالعلیم خان ءَ وتی گشتانک ءَ گوشت کہ پاکستان بیلاروس ءِ گوما دو نیمگی کمک ءَ را دیمروئی دیگ ءِ واھشت مند اِنت ءُ دوئیں ملک استیں معاہدہ آنی سر ءَ ترندی ءَ گوں پیشرفت لوٹ اَنت تانکہ جتا جتائیں شوبگ آنی تہ ءَ عملی کار بندات کنگ بہ بیت۔ تر ءُ تاب ءِ اولی روچ ءَ مواصلات ءِ وفاقی وزیر عبدالعلیم خان ءَ بیلاروس ءِ توانائی ءِ وزیر ڈینس موروز ءُ مواصلات ءِ وزیر الیکسی لیخانووچ ءَ گوں گند ءُ نند کتگ ءُ دوئیں نیمگ ءِ مزن تک ءِ کارندہ آں بہر زورگ ءَ گند ءُ نند ھم کتگ۔ وفاقی وزیر ءِ ھمراہی ءَ پاکستان ءَ چہ مواصلات، صنعت، خوراک ءُ داخلہ ءِ وفاقی سیکرٹری ھم ھوار انت وھدیکہ اسٹیٹ بینک ءِ ڈپٹی گورنر، اقتصادی امور ڈویژن ءُ کامرس ءِ سیکرٹری ھم ڈل ءِ بھر انت۔ زانگ بہ بیت مزن وزیر محمد شہباز شریف آیوکیں ہفتگ ءَ بیلاروس ءِ تر ءُ تاب ءَ انت وھدیکہ دوئیں ملکاں یکجائی وزیرانی کانفرنس ءِ ہشتمی دیوان ءِ برجائی ءِ سرا ہم تپاک کتگ۔ ھمے رنگ ءَ بیلاروس ءِ مزن وزیر پاکستان ءِ تر ءُ تاب ءِ ساھت ءَ یک دگہ کاروباری دیوان ءِ ھم برجم دارگ بیت۔ مواصلات ءِ وفاقی وزیر عبدالعلیم خان ءَ دیوان ءُ کانفرنس آنی تہ ءَ بیلاروس ءِ وزیر آنی گوما گپ ءُ تران کنان ءَ گوشت کہ پاکستان ءُ بیلاروس ءِ نیام ءَ مواصلات ءِ شوبگ ءَ مزنیں گہتری آرگ بوت کنت ایشی ءِ واستہ دوئیں ملک آنی نیام ءَ تجارتی راہداری ءِ ھاسیں کرد پیلو کت کنت۔ پاکستان چین، اوگانستان یا ایران ءِ وسیلگ ءَ میان اُستمانی ریاستاں سر بوھگ ءَ چہ مشرقی یورپ ءِ راہ پچ کنگ لوٹیت۔ عبدالعلیم خان ءَ گوشت کہ اے شاہراہ ءِ منصوبگ اسٹریٹجک رنگ ءَ چہ ھاسیں سنگ میل ثابت بنت۔ آئی ءَ گوشت کہ دگنیا نوآبادیاتی ءِ نیمگ ءَ روگ ءَ اِنت ءُ آیوکیں وھد ءَ تجارت ءُ کاروبار ءِ دیمروئی ءَ گوں بندوک اِنت، ایشی ءِ واستہ ٹرانسپورٹ ءِ گہتری اولی ترجی اِنت۔ بیلاروس ءِ توانائی ءُ ٹرانسپورٹ ءِ وزیراں وفاقی وزیر عبدالعلیم خان ءِ تر ءُ تاب ءَ را وش آتک کتگ ءُ آئی ءَ را وتی ملک ءِ نیمگ ءَ چہ ھرچ وڑیں کمک ءِ دل یکیمی داتگ۔ زانگ بہ بیت کہ مواصلات ءِ وفاقی وزیر عبدالعلیم خان گوستگیں روچ ءَ بیلاروس ءَ سر بوتگ کہ اودا آ ’’ریاستی مہمان‘‘ بیت ءُ اے سرکاری تر ءُ تاب ءِ ساھت ءَ آئی ءَ را جتا جتائیں نوکیں مفاہمت نامہ ءِ سر ءَ دستخط کنگ ءِ موہ ھم رس ایت۔
