لاہور۔2اپریل (اے پی پی):مزن وزیر محمد شہباز شریف ءَ کسانیں ائید ءِ موہ ءَ ملائیشیا ءِ مزن وزیر داتو سری انور ابراہیم ءَ گوں ٹیلی فون ءِ وسیلگ ءَ رابطہ کتگ ءُ ای الفطر ءِ موہ ءَ انور ابراہیم ءُ ملائیشیا ءِ براتیں راج ءَ را دل ءِ جہلانکی ءَ چہ سلام ءُ دروت کتگ۔ مزن وزیر کارگس ءِ میڈیا ونگ ءِ رد ءَ اے موہ ءِ سر ءَ تران کنان ءَ مزن وزیر محمد شہباز شریف ءَ گوستگیں اکتوبر ءَ ملائیشیا ءِ مزن وزیر ءِ پاکستان ءِ تر ءُ تاب ءِ حوالہ دات ءُ دو نیمگی سیادی آنی تہ ءَ جوانیں پیشرفت ءِ سر ءَ دل یکیمی ءِ درشان کت ءُ ملائیشیا ءِ گوما دو نیمگی کمک ءَ را گیش مھکم کنگ ءِ پاکستان ءِ واھشت ءِ سر ءَ پدا زور دات۔ مزن وزیر انور ابراہیم ءَ پاکستان ءُ ملائیشیا ءِ نیام ءَ دو نیمگی سیادی ءِ رد ءَ مئی ءَ مزن وزیر محمد شہباز شریف ءِ کوالالمپور ءِ متوقع تر ءُ تاب ءِ ارزشت ءِ سر ءَ زور پر دات۔ آئی ءَ گوشت کہ تر ءُ تاب ءِ کامیابی ءَ را دل یکیمی کنگ ءِ واستہ تیاری بوھگ ءَ انت۔ مزن وزیر محمد شہباز شریف ءَ وتی ملائیشیا ءِ ھمکار ءِ منت گپت کنان ءَ گوشت کہ آ اے سال ءَ ملائیشیا ءِ تر ءُ تاب ءِ واھشت مند آں ءُ امیت کنت کہ اے تر ءُ تاب دوئیں ملک آنی واستہ سیت مند ثابت بیت۔ اے موہ ءِ سر ءَ ملائیشیا ءِ مزن وزیر ءَ پیسریگیں مزن وزیر محمد نواز شریف ءَ گوں ٹیلی فون ءَ ھم کسانیں گپ ءُ تران کت ءُ یک دومی ءَ را ائید ءِ مبارک بات دیگ ءِ وھد ءَ نیکیں واھگ درشان کت۔
