اسلام آباد۔31مارچ (اے پی پی):وفاقی وزیر داخلہ محسن نقوی ءَ ائید ءِ روچ ءَ راج ءِ شہید آناں خراج تحسین پیش کتگ۔ وزارت داخلہ ءِ نیمگ ءَ جاڑی بوتگیں بیان ءِ رد ءَ وفاقی وزیر ءَ واپدا ٹاؤن ءَ شھید لیفٹیننٹ محمد حسن اشرف ءِ گس ءِ تر ءُ تاب کتگ، اودا شھید ءِ پت محمد اشرف، آئی ءِ برات محمد حنان اشرف ءُ ایندگر کھول ءِ مردماں گوں گند ءُ نند کتگ۔ آہاں گوں آہاں وھد گوازینتگ، یکوئی ءُ دلپدردی ءِ درشانی کتگ۔ اے موہ ءِ سر ءَ محسن نقوی ءَ انتہا پسندیں ناشرکار آنی ھلاپ ءَ جنگ ءَ لیفٹیننٹ حسن اشرف ءِ غیر معمولی بہادری ءُ ابدمانیں قربانی آناں ساڑات۔ آئی ءَ گوشت کہ لیفٹیننٹ محمد حسن اشرف ءَ ناشرکار آنی گوما بہادری ءَ گوں دیم پہ دیم بوھگ ءِ وھد ءَ وتی جان ندر کتگ، آئی ءِ بہادری ءَ را دائم ءَ یات کنگ بیت۔ وفاقی وزیر ءَ چہ رھادگ بوتگیں ارواح ءِ ابدی امن ءِ واستہ ھم دعا کت ءُ من اِت کہ لیفٹیننٹ حسن اشرف ءِ وڑیں بامرد راج ءِ واستہ فخر ءِ وسیلگ اَنت۔ آئی ءَ گیش تران کت کہ سرجمیں راج وتی شہیدانی قربانی ءِ وامدار اِنت ءُ ما ناشرکاری ءِ آفت ءِ ہلاس کنگ ءَ اے وام ءَ ادا کن ایں ۔ زانگ بہ بیت کہ لیفٹیننٹ حسن اشرف ءَ لھتیں ماہ پیسر میرانشاہ ءَ ناشرکارانی ھلاپ ءَ بہادری ءَ گوں جنگ ءِ وھد ءَ وتی جان ندر کتگ ات ءُ پاکستان ءِ رکھینگ ءِ ھاترا بے دروریں جزم ءِ درشان کتگ ات۔
