اسلام آباد۔28مارچ (اے پی پی): پٹرولیم ءُ نیچرل گیس ءِ بنجاھی وزیر علی پرویز ملک ءَ گوں ڈنمارک ءِ پاکستان ءِ سفیر جکوب لیکوف ءَ گند ءُ نند کت۔ گند ءُ نند ءَ توان ءِ شوبگ ءَ دو نیمگی کمک ءِ دیمروئی ءُ پاکستان ءَ معدن ءُ کان کنی ءِ شوبگ ءَ ڈنی ٹیکنالوجی ءِ کرد ءِ سر ءَ ھیال ریچی کنگ بوت۔ پٹرولیم ڈویژن ءِ جارکش ءِ نیمگ ءَ جاڑی بوتگیں بیان ءِ رد ءَ بنجاھی وزیر علی پرویز ملک ءَ ڈینش ٹیکنالوجی ءُ سرمایہ کاری ءَ چہ پائدگ چست کنان ءَ معدنی وسیلگ آنی پروسیسنگ ءَ را گہتر کنگ ءِ واستہ پاکستان ءِ گہتریں واھشت ءِ درشان کتگ ءُ ڈینش سرمایہ کاری ءُ ٹیکنالوجی ءِ ٹرانسفر ءِ آسراتی ءِ واستہ حکومتی تک ءَ ھمک وڑیں کمک ءِ پیشکش کتگ۔ آئی ءَ گوشت کہ حکومت سرمایہ کار آنی واستہ جوانیں چاگرد پجاری ءِ واستہ جزمیگ انت۔ آئی ءَ 8-9 اپریل 2025 ءَ برجم دارگ بوھوکیں پاکستان منرل انویسٹمنٹ فورم ءِ ساھت ءَ ایف ایل اسمتھ ءَ ھوار ڈینش کمپنی آناں پاکستانی کمپنی آنی گوما شریکداری ءِ موہ آناں پٹ ءُ پول کنگ ءِ دعوت داتگ۔ سیمنٹ، معدنیات ءِ پروسیسنگ ءُ کاربن ءِ کشگ ءِ کمی ءِ واستہ ایف ایل اسمتھ ءِ نوکیں حل پاکستان ءِ مول ءُ مراد ءِ رد ءَ انت کہ ایشی ءِ تہ ءَ کارکردگی ءَ را گیش کنگ ءُ معدنیات ءِ صنعت آنی تہ ءَ چاگردی اثر آناں کمی ءِ سر ءَ دلگوشی دیگ بوتگ۔ ڈن ءِ تر ءُ تاب ءَ پاکستان ءِ توانائی ءِ ردوم ءُ صنعتی دیمروئی ءِ واستہ ڈن ءِ کمک ءِ یک رندے پدر کنگ بوت۔ آئی ءَ گوشت کہ ڈن ءَ پاکستان معدنیات سرمایہ کاری فورم ءِ تہ ءَ سرگرمی رنگ ءَ بھر زوری کنت ۔ ایف ایل اسمتھ یک تربیتی پروگرام ءِ بندات کنت، بریم (بریڈشا ریسرچ انیشیٹیو فار منرلز اینڈ مائننگ)، ایشی ءِ چیر دستی ءَ 100 پاکستانی انجینئر آنی تربیت دیگ بیت۔ ایف ایل اسمتھ ءَ پیسر ءَ چہ پاکستان ءِ معدنی شوبگ ءَ 5 شراکت داری ءِ معاہدہ کتگ۔ آئی ءَ گوشت کہ ڈن ءِ کمپنی گرین مائننگ، آٹومیشن ءُ ڈیجیٹلائزیشن ءِ ھوالگ ءَ وتی زانتکاری ءَ را پاکستان ءِ گوما بھر ءُ بانگ کنگ ءِ واستہ جزم اَنت تانکہ پاکستان وتی اقتصادی ءُ چاگردی مول ءُ مراد آناں پیلو بہ کنت۔ ڈینش شپنگ کمپنی موراساکی ءَ پیسر ءَ چہ 2 ارب ڈالر ءِ سرمایہ کاری ءِ وعدہ کتگ ءُ جہاز ءِ ری سائیکلنگ ءُ دوبر فولنگ ءِ سرا گرین اموناک ءِ گوما کار کنگ ءِ منصوبہ بندی کتگ۔
