اسلام آباد۔28مارچ (اے پی پی): بنجاھی وزیر خزانہ ءُ آمدنی محمد اورنگزیب ءَ گوشت کہ بجلی ءِ نہاد آنی تہ ءَ کمی ءَ چہ مینوفیکچرنگ ءِ شوبگ ءَ را دیمروئی رسیت ءُ برآمدات ءَ را گیشی بیت۔ نوکیں مالی سال ءِ بنجاھی بجٹ ءَ ٹیکس آنی دائرہ کار ءَ را گیش کنگ ءِ سر ءَ دلگوشی دیگ بیت ایشی ءِ تہ ءَ رئیل اسٹیٹ، ریلوے ءُ زراعت ءِ شوبگ ھوار اَنت۔ آئی ءَ اے گپ جمعہ ءِ روچ ءَ چنامانی باؤ فورم ءِ ساھت ءَ گلوبل پبلشنگ ءُ براڈکاسٹنگ میگزین بلومبرگ ءَ گوں انٹرویو دیان ءَ گوشت۔ وزیر ءِ ھزانگ ءَ گوشت کہ حکومت ءِ دلگوشی معیشت ءَ را گہتر جوڑ کنگ ءِ سر ءَ انت ءُ برآمدات ءَ را گیش کنگ ءِ واستہ حکمت عملی ءِ سر ءَ کار بوھگ ءَ انت۔ آئی ءَ گوشت کہ مزن وزیر ءِ سروکی ءَ بجلی ءِ نہاد آنی تہ ءَ کمی ءِ واستہ گامگیج کنگ بوھگ ءَ اِنت، ایشی ءِ درگت ءَ مزن وزیر ءِ نیمگ ءَ چہ زوت جار ءِ امیت اِنت۔ اے گامگیج ءَ چہ مینوفیکچرنگ سیکٹر ءَ را دیمروئی رسیت ءُ برآمدات ءَ را گیشی بیت۔ آئی ءَ گوشت کہ آیوکیں بنجاھی بجٹ ءَ ٹیکس آنی دائرہ کار ءَ را گیش کنگ ءِ سر ءَ دلگوشی دیگ بیت۔ رئیل اسٹیٹ، رئیل اسٹیٹ ءُ زراعت ٹیکس ءِ نظام ءِ تہا ہوار کنگ بیت۔ ٹیکس ءِ بنیات آناں گیش کنگ ءَ چہ مینوفیکچرنگ ءِ شوبگ ءِ سر ءَ غیر ضروری ٹیکس آنی بوجھ کم کنگ بیت، پرچا کہ اے شوبگ ءَ تاں انوگ ءَ ٹیکس آنی مزنیں بھرے ادا کنگ ءَ بوتگ۔ افراط زر ءِ رجحان آنی سر ءَ دل یکیمی ءِ درشان کنان ءَ وزیر ھزانگ ءَ گوشت کہ افراط زر ءِ سرجمیں ءُ بنیاتی تک ءِ سر ءَ نزیکیں نگرانی کنگ بوھگ ءَ اِنت۔ اے سال ءِ تہ ءَ سود ءِ شرح ءَ گیش کمی ءِ گمان اِنت۔ سود ءِ شرح ءِ تہ ءَ کمی ءَ چہ اقتصادی دیمروئی ءِ واستہ جاور ھال گیش گہتر بنت۔ ھزانگ ءِ وزیر ءَ گوشت کہ پاکستان میاں اوستمانی بانڈ مارکیٹ ءَ واتر بوھگ ءِ واستہ گامگیج کنگ ءَ انت۔ ما وتی اولی چینی یوآن بانڈ ءَ رواں کیلنڈر سال ءَ شنگ کنگ ءِ ارادہ کنیں۔ یوآن بانڈ ءِ زرّ 200 ءَ بگر داں 250 ملین ڈالر ءِ نیام ءَ بیت۔ بانڈ ءِ کساس ھژدری نہ اِنت بلے فنڈنگ ءِ وسیلگاں تنوع ءِ مول ءُ مراد اِنت۔ اے فنڈ موسمی بدلی ءَ گوں سیادی داروکیں منصوبگ آنی واستہ کارمرد کنگ بیت۔ آئی ءَ گوشت کہ اے گامگیج ءِ مول ءُ مراد امریکہ، یورپ ءُ اسلامی سکوک ءِ روایتی مارکیٹ آنی چہ دور فنڈنگ وسیلگ آناں تنوع دیگ اِنت۔ اے وھد اِنت کہ پاکستان دنیا ءِ دومی مزنیں سرمایہ ءِ بازار ءَ چہ پائدگ چست بہ کنت۔
