اسلام آباد۔ 28 مارچ (اےپی پی) بنجائی وزیر کانود اعظم نذیر تارڑ تون آسٹریلین ہائی کمشنر نیل ہاکنز اوڑدہی کرے۔ وزارت کانود و انصاف نا ترجمان نا رداٹ اوڑدہی ٹی ہڑتوم آ کنڈآتا تعلقداری، تین پہ تینی است خواہی نا امور و سیکورٹی حالیت آتیا گپ وتران کننگا۔ اوڑدہی ٹی ہائی کمشنر نیل ہاکنز ساڑی آ سیکورٹی حالیت آتیا گپ وتران کرسا جعفر ایکسپریس واقعہ غا است ہسونی نا درشانی ءِ کرے۔ اوپارے کہ آسٹریلوی حکومت بلوچستان اٹ مائننگ نا بشخ اٹی است خواہی تخک و دابابت اڈ ہلوک منرلز کانفرنس اٹی بشخ ہلنگ نا خواہندار ءِ۔ داوخت آ وزیرکانود اعظم نذیر تارڑ باوری کرفے کہ بنجائی حکومت دابشخ اٹی زرکاری و شونداری کن پبی گام گیج کننگ ءِ وخت اس کہ زرگزران ءِ سوگو کننگ حکومت نا اولیت ءِ۔ اوڑدہی ٹی انسانی حق واوفتا رکھ انا بابت ہم سرجمی اٹ گپ وتران مس۔ آسٹریلین ہائی کمشنر وزیرکانود نا بطور وزیر انسانی حق انا کروک آ کوشست آتا ستاءِ کرے و قومی کمیشن انسانی حق انا بابت پیش رفت نا ستاءِ کرے۔ داکان بیدس، اوڑدہی ٹی کانودی باندات آتیا ہم گپ وتران کننگا۔ ہراٹی ہڑتوم آ کنڈآتا کمکاری نا گمان و عدالتی نظام نا بابت گام گیج آتیا سجفنگا۔
