اسلام آباد۔ 28 مارچ (اے پی پی) مسکوہی سیکرٹری خارجہ نجم الدین اے شیخ کراچی ٹی کزیت کرے۔ دفترخارجہ نا ترجمان نا کنڈآن جاری ہڑزخواہی بیان اٹی پاننگانے کہ وزارت خارجہ اسہ پنی آ سفارتکار و پاکستان نا مسکوہی سیکرٹری خارجہ (1997-1994)نا کزیت نا پڑوکیک۔ او جمعہ نا سہب 58 سال انا وئی ٹی کراچی ٹی تینا حقی آ خالق تون ہناملا۔ دفترخارجہ نا رداٹ یونیورسٹی آف سندھ و ٹفٹس یونیورسٹی نا فلیچر اسکول آف لا اینڈ ڈپلومیسی نا مسکوہی طالب علم نجم الدین اے شیخ تینا زند انا کم و ود چار دہائی اہم عزم و امتیاز تون پاکستان نا خذمت کن وقف کرے۔ اونا شاندار کیریئراٹی جرمنی، کینیڈا، امریکہ و ایران اٹی بطور سفیر تعیناتی اوار ءِ، ہراڑے او مہارت اٹ پاکستان نا سفارتی فائدہ غاتے مون آ درے۔ سیکرٹری خارجہ نا وڑاٹ او تینا بصیرت انگیز کماشی ٹی خارجہ پالیسی ءِ اسٹریٹجک دوراندیشی اٹ جوڑ کرے و اوکان پد بروک آ سفارتکار آتا راہشونی ءِ کرے۔ دفترخارجہ نا رداٹ تینا سفارتی ذہانت کن پنی نجم الدین اے شیخ جہانی کمکار، علاقائی سوگوی و انسانی حق انا ثابت گام مخ تف ئس۔ اودے اندرون و پیشن نا ملک بھلو کچ اسے آ عزت تننگا، سنگت و ہم منصب آک اسہ وڑاٹ اونا دیانتداری ، کسبی مہارت و پاکستان کن بدل مفروک لگن نا ستاءِ کریر۔ بیان اٹی مستی پاننگانے کہ تینا سفارتی خذمت آتیان بیدس او انسٹی ٹیوٹ آف اسٹریٹجک اسٹڈیز اسلام آباد نا بورڈ آف گورنرز اٹی خذمت سرتس و او سندھ کونسل آف فارن ریلیشنز نا بانی باسک ئس۔ وزارت خارجہ اونا خاہوت، سنگت و ہموغٹ مخلوق تون تینا ہڑزخواہی نا درشانی ءِ کیک ہرافتے اوڑتون چاہنگ و کاریم کننگ نا اعزاز دوئی ءِ، اونا خذمت و مدبرانہ وراثت بروک آ چین تیکن اسہ تحریک اسے نا وڑاٹ برجاسلک ۔
