اسلام آباد – 27 مارچ (اے پی پی): اسپیکر راجی اسمبلی سردار ایاز صادق ءَ گوں یکوئی ءِ درشانی کتگ۔ بزگریں فلسطینیانی حمایت ءُ اولی قبلہ ءِ آجوئی ءِ مئے عزم ءِ نوک کنگ ءِ ھاترا۔ پاکستان ءِ پارلیمنٹ ءُ الس فلسطینی آنی وت واجئی ءُ آجوئی ءِ ھک ءِ سرجمی ءَ حمایت کنت۔ قدس روچ ءِ موہ ءَ وتی کلوہ ءِ تہ ءَ آئی ءَ گوشت کہ پاکستان 1967ءَ چہ پیسر ءِ سیم سر آنی سر ءَ یک آزاتیں فلسطین ریاست ءِ جوڑ کنگ ءُ القدس الشریف ءَ را وتی دارالحکومت جوڑ کنگ ءِ وتی اصولی موقف ءِ سر ءَ اوشتاتگ۔ راجی اسمبلی ءِ سروک ءَ گیش گوشت کہ فلسطین ءِ جیڈھ ءِ عادلانہ گیواری اقوام متحدہ ءِ قرارداد آنی رد ءَ دمگ ءَ دائمی امن ءِ برجائی ءِ واستہ المی اِنت۔ اسپیکر سردار ایاز صادق ءَ گوشت کہ پاکستان ءِ پارلیمنٹ ءَ بے گناھیں فلسطینی الس ءِ سر ءَ اسرائیل ءِ زوراکی ءُ فلسطین ءِ سرڈگار ءِ سر ءَ ناجائزیں قبضہ ءِ ھلاپ ءَ بازیں قرارداد یکوئی ءَ منظور کتگ ءُ سرجمیں میاں اوستمانی ءُ دمگی پارلیمانی فورم آنی تہ ءَ فلسطین ءِ جیڈھ ءَ را زور ءَ گوں پدر کتگ۔ آئی ءَ پاکستان ءِ پارلیمنٹ ءِ فلسطینی اُلس ءِ آجوئی ءُ وت واجہی ءِ واستہ بے مٹیں کمک ءِ عزم ءِ سر ءَ یک رندے پدا گوشت۔ فلسطین ءَ برجاھیں اسرائیل ءِ زوراکی ءِ مذمت کنان ءَ اسپیکر ءَ گوشت کہ 27اکتوبر 2023ءَ چہ اسرائیل ءِ فاشزم ءُ بربریت ءِ سبب ءَ 50 ہزار ءَ چہ گیش بے گناہیں فلسطینی شہید بوتگ اَنت کہ ایشی ءِ تہ ءَ مزنیں کساسے زھگ، جنین ءُ پیریں مردم اَنت۔ راجی اسمبلی ءِ سروک ءَ گوشت کہ اسرائیل ءِ نیمگ ءَ چہ جنگ بندی ءَ پد ھم انوگیں زوراکی ءُ انسانی ھکانی لگتمالی مذمت ءِ لائک انت۔ اسرائیل ءِ بالی اُرشانی سبب ءَ بے گناھیں فلسطینی آنی کوش ءُ فلسطین ءِ بنیاتی ڈھانچہ ءِ تباہی میاں اوستمانی کانود ءِ پدریں ھلاپ ورزی اِنت ۔ اے موہ ءِ سر ءَ راجی اسمبلی ءِ سروک ءَ میاں اوستمانی براتی ءَ را اسرائیل ءِ زوراکی ءِ گر ءُ دار ءُ فلسطینی الس ءِ ھک آنی رکھینگ ءِ واستہ جوانیں گامگیج چست کنگ ءِ لوٹ کتگ۔ آئی ءَ گوشت کہ غزہ ءَ برجاھیں انسانی بحران ءِ سر ءَ ھاموشی مجرمانہ لاپرواہی ءِ برابر اِنت۔ آئی ءَ گوشت کہ پاکیں ماہ ءِ ساھت ءَ ھم فلسطینی الس بنیاتی لوٹ آناں چوشکہ وردن ءُ درمان آنی سک باز کمی ءِ آماچ انت۔ آئی ءَ گیش کرتگ کہ فلسطین ءَ اسرائیل ءِ اُرشاں چہ نادراھجاہ ءُ پناہ گاہاں ھوار بنیاتی ڈھانچہ سرجم ءَ ھلاس بوتگ اَنت۔ آئی ءَ چہ میاں اوستمانی براتی ءَ ھاسیں رنگ ءَ اقوام متحدہ ءُ انسانی ھکانی ادارگاں لوٹ کتگ کہ آ زوتیں کمک ءِ پھجارینگ ءَ را دل یکیمی بہ کن اَنت ءُ ھمے رنگ ءَ اسرائیل ءِ زلم ءُ زوراکی آنی ھلاسی ءِ واستہ عملی گامگیج بہ زور اَنت۔ اے موہ ءِ سر ءَ راجی اسمبلی ءِ ڈپٹی اسپیکر سید غلام مصطفیٰ شاہ ءَ گوشت کہ قدس روچ مارا وت مہ وتی یکوئی ءُ یکوئی ءِ سبق ءَ دنت ۔ آئی ءَ گوشت کہ فلسطینی اُلس ءِ قربانی بے سوب نہ رو اَنت ءُ آھانی آجوئی ءِ جہد المی ءَ سوبمند بیت ۔ آئی ءَ میاں اوستمانی براتی ءِ سر ءَ زور پر دات کہ آ اسرائیل ءِ نیمگ ءَ جنگ بندی ءِ جوانیں نفاذ ءَ را دل یکیمی بہ کنت ءُ بے سلاہیں فلسطینی آنی سر ءَ اسرائیل ءِ جاری ظلم ءُ زوراکی آنی گر ءُ دار ءَ وتی کرد ءَ پیلو بہ کنت۔
