اسلام آباد۔ 27مارچ (اے پی پی) بنجائی وزیر داخلہ محسن نقوی تون امریکہ ناقائم مقام سفیر نتالی بیکر اوڑدہی کرے ہراٹی پاک امریکہ تعلقداری، تین پہ تینی است خواہی نا امور تون اوار ہڑتوم آ کنڈآتا کمکاری و دہشت گردی نا برخلاف تین پہ تینی شریداری ءِ ودفنگ نا بابت ہم گپ وتران کننگا۔ قائم مقام امریکی سفیر نا جعفر ایکسپریس و ایلو دہشت گردانہ جلہو آتا مذمت و شہید آتا خاہوت آتون ہڑزخواہی نا درشانی ءِ کرے۔ اوپارے کہ پاکستان اٹ دہشت گردی نا ساڑی آ واقعہ غاتیٹی زوال کروک آ بندغ آتا خاہوت آتون دلی ہمدردی ءِ۔ اوڑدہی ٹی برجاسال جون اٹی کاؤنٹر ٹیررازم ڈائیلاگ کرفنگ آ امنا کننگا۔ وزیر مملکت داخلہ طلال چودھری ،امریکہ نا پولٹیکل قونصلرزیک ہارکن رائیڈر و بنجائی سیکرٹری داخلہ خرم آغاہم داوخت آ ساڑی ئسر۔ قائم مقام امریکی سفیر طلال چوہدری ءِ وزیر مملکت داخلہ نا منصب ءِ سنبھالنگ آ مبارکبادی تس۔ وزیر داخلہ محسن نقوی نا پاننگ ئس کہ دہشت گردی اسہ جہانی ءُ ویل اسے ، داڑتون مون تننگ کن جہانی برادری ءِ اواری اٹ کاریم کروئی مریک۔ حکومت پاکستان دہشت گرد آتا برخلاف پبی کارروائی کننگ ءِ۔ اوپارے کہ دہشت گردی نا برخلاف جنگ انا رداٹ ہمہ جہتی پالیسی تیار کننگ انگ ءِ۔ امریکی صدر ڈونلڈ ٹرمپ انا منت وار اُن کہ اودہشت گردی نا برخلاف جنگ اٹی پاکستان نا کوشست آتا ستاءِ کرے۔ اوپارے کہ امریکہ ٹی غیرکانودی وڑاٹ رہینگوک پاکستانی تا ملک واپسی ٹی ہرممکن کمکاری ءِ کینہ۔ اوپارے کہ پاک امریکہ کاکس نا دیوان 30 اپریل آ نیویارک اٹی اڈ ہلیک۔ طلال چوہدری پارے کہ دہشت گردی نا برخلاف جنگ اٹی پاکستان بے مٹ قربانی تسنے۔ امریکہ نا سٹریٹجک پارٹنر ءِ۔ امریکی قائم مقام سفیر نیٹلی بیکر نا اسلام آباد اٹی برجاشونداری ڈٹ آتا ستاءِ کرے۔
