اسلام آباد۔ 27مارچ (اے پی پی) وزیراعظم محمد شہباز شریف پارینے کہ ورناتے انفارمیشن ٹیکنالوجی نا بشخ اٹی فنی تربیت نا فراوانی حکومت نا اولیت ءِ، ہواوے نا آئی سی ٹی ہیلکاری پروگرام آن نئے بیرہ آئی ٹی برآمد آتیٹی ودکی مریک بلکن ورناتے روزگار نا وارخواہی دوئی کننگ اٹ کمک ہم رسینگک۔ پی ایم آفس نا میڈیا ونگ آن جاری بیان نا رداٹ داخیال آتا درشانی ءِ وزیراعظم ہواوے نا چیف ایگزیکٹیو آفیسر ایتھن سن نا کماشی ٹی پنچ باسکی ڈل اتون گپ وتران کرسا کرے۔ ہرافک پنچ شنبے آ داڑے اوڑتون اوڑدہی کریر۔ داوخت آ بنجائی وزیر اقتصادی امور احدخان چیمہ، بنجائی وزیر حوالکاری و شینکاری عطاء اللہ تارڑ، بنجائی وزیر انفارمیشن ٹیکنالوجی و ٹیلی کام شزہ فاطمہ خواجہ، چیئرمین ہائرایجوکیشن کمیشن ڈاکٹر مختار احمد و تعلقدار بڑزکو سرکاری آفیسر آک ساڑی ئسر۔ وزیراعظم پارے کہ پاکستان ورناتے انفارمیشن ٹیکنالوجی نا بشخ اٹی فنی تربیت نا فراوانی حکومت نا اولیت ءِ، ہواوے تون پبی و مریس مدی شریداری خوانہ۔ اوپارے کہ ہواوے نا آئی سی ٹی ہیلکاری پروگرام آن نئےبیرہ آئی ٹی برآمد آتیٹی ودکی مریک بلکن ورناتے روزگار نا وارخواہی دوئی کننگ اٹ ہم کمک رسینگک۔ داوخت آ وزیراعظم ءِ ہواوے نا کنڈآن مسہ لکھ پاکستانی ورناتے آئی ٹی نا بشخ اٹی تربیت نا فراوانی نا بابت پیش رفت آحوال تننگا، اودے پاننگاکہ مسہ لکھ ورناتیان 2 لکھ 40 ہزار ورناتے بنداوی وڑوخت اس کہ 60ہزار ورناتے ہائی ٹیک تربیت فراوان کننگک۔ داسال انا ایسراسکان غٹ 3 لکھ ورناتا تربیت پورو مریک، تربیتی پروگرام تا تھرڈ پارٹی ویلیڈیشن کرفنگک۔ ہواوے، ہائرایجوکیشن کمیشن نا شریداری اٹ پانزدہ پاکستانی یونیورسٹی تیٹی مصنوعی ذہانت ، کلاؤڈ کمپیوٹنگ ، بگ ڈیٹاوسائبر سیکورٹی نا کورس درستی راستی کرفنگانے۔
