اسلام آباد۔ 27مارچ (اے پی پی) وزیراعظم محمدشہباز شریف پارینے کہ ورناک ننکن اسہ چیلنج اسے تون اوار اوار اسہ عظیم ءُ موقع اس ہم ارے، ورناتے آئی ٹی، مصنوعی ذہانت و کسبی تربیت تننگے تو دا ملک انا عظیم سرمایہ جوڑ مریرہ، ورناتے تربیت و پوسکن آ ٹیکنالوجی نا فراوانی آ زرکاری کیر تو پاکستان منہ سال آتیٹی غٹ آن زیات شون ہلوک ملک جوڑ مریک،وامدار زندءِ وقار نا زند اٹی بدل کروئی ءِ، کنا دعا ءِ کہ آئی ایم ایف نا ساڑی آ پروگرام ملکی تاریخ نا آخیریکو پروگرام مرے۔ پنچ شنبے نادے آ داخیال آتا درشانی ءِ وزیراعظم پرائم منسٹرز ڈیجیٹل یوتھ ہب انا بناءِ کننگ نا دود آن تران کرساکرے۔ داوخت آ بنجائی وزیر حوالکاری و شینکاری عطاء اللہ تارڑ ، وزیر امور کشمیر و گلگت بلتستان امیر مقام، بنجائی وزیر انفارمیشن ٹیکنالوجی شزہ فاطمی خواجی ئسک ہم ساڑی ئسر۔ وزیراعظم محمد شہباز شریف پارے کہ اینو نادے اسہ یکتاءُ خوشی نادے اسے۔ ہرازمانہ ٹی مصنوعی ذہانت نا کس اس سماالوکہ دازمانہ ٹی بطور وزیراعلیٰ پنجاب تعلیم، جان جوڑی وورناتیک اولیتی گام گیج کرین، پنجاب اٹی 2011آن 2018 اسکان میرٹ نا بنداو آ 4 لکھ لیپ ٹاپ ہُشار طالب علم آتیٹی مفت بشخنگا۔ ورناتے آئی ٹی، مصنوعی ذہانت و کسبی تربیت تننگے تو دا ملک انا عظیم ءُ سرمایہ اس جوڑ مریرہ۔ اینو نا دنیا پوسکن آ ٹیکنالوجی نا کاریم اٹ اتنگ نا خواہندار ءِ۔ پاکستا ن نا ورناک ننکن اسہ چیلنج اسے تون اوار اوار اسہ عظیم ءُ موقع اس ہم اریر۔ وزیراعظم پارے کہ اللہ تعالیٰ پاکستان ءِ قدرتی نعمت آتیان شپ کرینے۔ اگہ جتا ملک آتے قدرتی وسیلہ غاتا نعمت دوئی ءِ تو کروڑ آ ورناک پاکستان نا سرمایہ ءُ۔ اگہ آزاد کشمیر، گلگت بلتستان تون اوار مچ آملک انا کروڑ آ ورناتے تربیت و پوسکن آ ٹیکنالوجی نا فراوانی آ زرکاری کیر تو پاکستان منہ سال آتیٹی غٹ آن زیات شون ہلوک ملک جوڑ مریک۔ داڑکن ننے بھاز خواری کروئی مریک۔ رانا مشہود احمد خان ءِ پروڈکٹو ایمپلائمنٹ نا ٹاسک تننگانے تانکہ ورناتے کشاری وصنعتی بشخ، آئی ٹی ہاؤسز، یونیورسٹی و ٹیکنیکل سینٹرآتیٹی گچین تربیت ترفنگ آن پد ملازمت ترفر۔ وزیراعظم پارے کہ نن تینا خڑچ آتے کم کینہ ولے پاکستان نا ورناتے گچین تربیت نا فراوانی ءِ پک کینہ۔ ننا ٹریننگ سینٹرآتیٹی گچین ٹرینربایدے بریر۔ ورناک نان میرات ءُ، اوفتے گچین کسب آن بہرہ مند کینہ۔ کسب کار ورناتا کمک اٹ ملک انا آخبت ءِ شاندار کینہ۔ وزیراعظم پارے کہ دا پورٹل نا کمک اٹ صوبہ غاتون اواری اٹ وسیلہ غاتا فراوانی ءِ پک کننگک۔ وزیراعظم پارے کہ 77 سال اٹی ننا وامک بھاز ودانو۔ کنا دعاءِ کہ آئی ایم ایف نا ساڑی آ پروگرام ملکی تاریخ نا آخیریکو پروگرام مرے انتئے کہ آئی ایم ایف نا پروگرام تیان قومک شون ہلپسہ بلکن زرگزرانی ٹک آتے سوگو تو کننگ مریک و داسوگوی پاکستان اٹ بسنے۔ اوپارے کہ آئی ایم ایف تون اسٹاف لیول معاہدہ مسنے۔ آئی ایم ایف نا بورڈ آف گورنرنا مئی ٹی مروک آ دیوان اٹی اسہ ارب ڈالر نا بروک آ قسط انا منظوری مریک۔ ورناک دا وام تا زند ءِ شرف نا زند اٹی بدل کروئی ءِ۔ بزغر، صنعت کار وورناتے زرگزرانی وڑاٹ سوگو کروئی مریک ۔ ای آخیریکو دم اسکان نماحق اکن جنگ ترسا کیوہ و آخیریکو حد اسکان قوم ءِ وام تیان نجات ترفیوہ۔ خادم جوڑ مرسا پاکستان نا خذمت ءِ کرسا کیوہ۔ ننے وام تیان نجات ہلنگ کن تینا پیدوار و برآمد آتیٹی ودکی کروئی مریک۔ ار ب و کھرب آ روپئی نا مقدمہ غاک عدالت و ٹربیونل آتیٹی سماعت اٹی ءُ۔ بیرہ سندھ ہائی کورٹ آن اسہ حکم امتناعی خارج مننگ آن 23 ارب روپئی قومی خزانہ ٹی مچ مس، ہندا وڑ لاہور ہائی کورٹ ہم 11 ارب روپئی نا کیس انا حکم امتناعی ءِ خارج کرے۔ انشاء اللہ دے و نن خواری کرسا پاکستان ءِ تینا نت تیا سلفنہ۔ داکان مست دود آن تران کرسا وزیراعظم یوتھ پروگرام نا چیئرمین رانا مشہود احمد خان پارےکہ راج ہموتم آ مون آکاہک ہراتم میرٹ ءِ اولیت تننگک۔ پاکستان اٹ دا تینا وڑنا اولیکوپورٹل مریک۔ وزیراعظم زرگزران ءِ سہی کنڈآ درے۔ قوم انا پوسکن جوڑ کننگ نا بنامننگ والا ءِ۔ ڈیجیٹل ہب آن ورناک اسکالرشپ، گوازی، آئی ٹی، سیل و سوات، گرین اکانومی تون اوار ایلو بشخ آتیٹی فائدہ ہرفنگ کیرہ۔ شہباز شریف ہمو لیڈر ءِ ہرا ورناتے ہر میدان اٹ واکدار کننگ خوارہ۔ دود آن تران کرسا یونیسیف پاکستان نا آفیسر انچارج شرمیلا رسول پارے کہ دا ڈیجیٹل ہب وارخواہی تینا پُر ءِ۔ پاکستان نا ورناک لائخ ءُ۔ پاکستان اسہ سوگو ملک جوڑمرسا مون آ بریک۔ ورناتے واکدار کننگ کن گچین گام گیج و بنداوی اصلاحات المی ءِ۔ دود آن تران کرسا گلوبل سیمی کنڈکٹر گروپ نا چیئرمین نوید شیروانی پارےکہ دنیا ترندی اٹ بدل مننگ ءِ و مصنوعی ذہانت پوسکن آٹیکنالوجی نا رجحان ترندی اٹ مون آ ہِننگ ءِ ۔ ورناتے سازگار چاگڑد اس فراوان کننگ نا گرج ءِ۔ پاکستان نا ہر شاری تون بریبری وارخواہی مرے۔اقوام متحدہ نا ریذیڈنٹ کوآرڈی نیٹر محمد یحییٰ پارے کہ ڈیجیٹل یوتھ ہب پلیٹ فارم ءِ ورناتا لائخی تے تالان کننگ کن تیار کننگانے۔ یوتھ ہب لیڈرشپ پروگرام و چاگڑدی رکھ انا گام گیج آتون اوار بے شمار وارخواہی تا فراوانی نا ذریعہ مریک۔ داپاکستان نا پوسکن آ چین اکن اسہ لانچنگ پیڈ اسے۔ پاکستان ورناتا ملک ءِ 64 درسد آبادی30 سال آن کم بندغ آتیاتالان ءِ۔ دا ورناک بدلی نا قوت و شونداری نا ذریعہ ءُ۔ ڈیجیٹل یوتھ ہب پاکستان ءِ شونہال ، سوگو وپاکستان ءِ شون ہلوک کننگ نا سفرنا بناءِ۔ دابیرہ اسہ ویب سائٹ یا ایپ اس اف بلکن دااسہ ایکوسسٹم اسے۔
