اسلام آباد۔ 26 مارچ (اے پی پی) چیئرمین سینیٹ سید یوسف رضاگیلانی و ڈپٹی چیئرمین سینیٹ سیدال خان ایسوسی ایٹڈ پریس آف پاکستان (اے پی پی) ایمپلائز یونین اسلام آباد نا ساڑی آگچین کاری تیٹی سرسہبی دوئی کروک آ صدر و سینئر صحافی طارق محمود چوہدری، نائب صدر شمائلہ نورین و سہیل اقبال چیمہ، جنرل سیکرٹری محمد قاسم گجر، فنانس سیکرٹری طاہر ندیم، پریس سیکرٹری صنم جونیجو تون اوار غٹ پوسکن گچین مروک آ عہدیدار آتے دلی مبارکبادی پیش کرینے۔ چارشنبے نادے آ سینیٹ سیکرٹریٹ آن جاری بیان نا رداٹ تینا اسیجائی تہنیتی کلہو اٹی چیئرمین سینیٹ سید یوسف رضاگیلانی و ڈپٹی چیئرمین سیدال خان پوسکن گچین مروک آ سرکڑدہ غاتے اوفتا سرسہبی آ مبارکبادی ترسا اومیت ظاہر کریر کہ او کارندہ غاتا راجی آسودہی و صحافتی ادارہ نا گچینی کن پبی کڑد ادا کیرہ۔ اوفک پاریر کہ صحافت ہر جمہوری راج انا اسہ بنداوی تمبہ ءِ، و آجو، متحرک و زموار میڈیا ہی الس ءِ سہی معلومداری فراوان کننگ و جمہوری قدر ءِ مون آ دننگ اٹ اہم کڑد ادا کیک۔ سینیٹ سرکڑدہ غاک پاریر کہ اے پی پی کون آ قومی خبررساں ادارہ ٹی خواری کش و لائخ آ بندغ آتا کماشی ادارہ نا شونداری کن اسہ جوان ءُ گام اسے۔ اوفک پاریر کہ پوسکن گچین مروک آ عہدیدارآک تینا لائخی تے کاریم اٹ اتسا صحافی برادری نا حق انا رکھ، ویل آتا ایسری و کسبی گچینی کن کاریم کیرہ۔ اوفک مستی پاریر کہ میڈیا ورکرآتا راجی آسودہی حکومت و تعلقدار ادارہ غاتا اولیت مرے، و سینیٹ آف پاکستان مدام صحافی تا روا حق، اوفتا روزگار نا رکھ، آجوئی درشانی و گچین کاریم نا چاگڑدکن ہرممکن کمک فراوان کیک۔
