اسلام آباد۔23مارچ (اے پی پی):مزن وزیر محمد شہباز شریف ءَ راج ءِ سر ءَ زور پر دات کہ آ قائداعظم محمد علی جناح ءِ ایمان ، یکوئی ءُ تنظیم ءِ رھبندانی رندگیری ءَ بہ کنت ءُ پاکستان ءَ را وشھال ءُ وشھالی ءِ واب ءَ پیلو بہ کنت ۔ یک شمبے ءِ روچ ءَ پاکستان ءِ روچ ءِ موہ ءَ وتی کلوہ ءِ تہ ءَ مزن وزیر ءَ گوشت کہ مرچی راج پاکستان ءِ روچ ءِ درگت ءَ اللہ تعالیٰ ءِ شگر ءُ منت وار ایں ءُ پاکستان ءِ بُن ھشت ایر کنوک قائد علیمہم علامہ اعظم ءِ الہام بخشیں سروکی ءَ پاکستان ءَ را یک جتاھیں ملکے ءِ رنگ ءَ جوڑ کنگ ءِ واستہ وتی پیرین آنی کوشست ءَ را شرپ دیان آں ۔ آئی ءَ گوشت کہ 23 مارچ 1940 ءَ منظور بوتگیں پاکستان ءِ قرارداد مئے پیرین آنی آجوئی ءِ مشن ءِ گوما بے مٹیں جزم ءِ درشان انت۔ آئی ءَ گوشت کہ پاکستان ءِ بیرک پاکستان تحریک ءِ وھد ءَ مئے پیرین آنی جزم ءُ جہد ءِ درشان انت مرچی پاکستان یک آجوئیں ءُ وت واجہیں ملکے ایشی ءِ واستہ ما وتی رب ءِ شگر ءُ منت وار ایں ۔ آئی ءَ پاکستان ءِ سلاہ بندیں اُرد، صنعت، اکیڈمیا، ءُ اسپورٹس ءِ کرد ءِ توسیپ کت ءُ گوشت کہ آہانی سبب ءَ پاکستان ءَ دنیا ءِ تہا یک مزنیں جاہ ءُ مقامے رستگ ءُ ہمے وھد ءَ پارلیمنٹ، عدلیہ ءُ انتظامیہ ہم وتی آئینی ذمہ واریاں پیلو کنگ ءَ انت۔ مزن وزیر ءَ گوشت کہ حکومت اقتصادی برجائی ءِ ھاترا کوشست کنگ ءَ اِنت ءُ ادارگی اصلاحات ءِ ھواری ءَ ڈھانچہ ءِ بدلی آنی سر ءَ عمل کنگ ءِ واستہ کوشست کنگ ءَ اِنت۔ مزن وزیر ءَ ناشرکاری ءِ ھلاپ ءَ جنگ ءَ مزنیں قربانی ءِ پاکستان ءِ سلاہ بندیں اُرد، رینجرز، پولیس ءُ کانود نافذ کنوکیں ادارگ آنی دلیری ءَ را سلامی دات۔ آئی ءَ گوشت کہ مرچی بیا اِت ما قائداعظم ءِ ایمان، یکوئی ءُ تنظیم ءِ راھبند آنی پد ءُ رند کنگ ءِ عہد بہ کن ایں تانکہ پاکستان یک مزن، دیمروئی کتگیں ءُ وشھالی ءِ ریاست جوڑ کنگ بہ بیت۔
