اسلام آباد۔ 20 مارچ (اے پی پی) ترجمان دفترخارجہ پارینے کہ وزیراعظم محمد شہباز شریف نا سعودی عرب نا دورہ نا مسخت ہڑتوم آ کنڈآتا تعلقداری تے سوگو کننگ، اقتصادی کمکاری ءِ ودفنگ و ہڑتوم آ ملک آتا نیام اٹ زرکاری ءِ مون آ دننگ ءِ۔ ترجمان دفترخارجہ شفقت علی خان پنچ شنبے نادے آ داڑے پریس حوال اٹی پارے کہ وزیراعظم محمد شہباز شریف داوخت آ سعودی عرب نا سرکاری دورہ غاٹی ءِ۔ اوپارے کہ وزیراعظم سعودی ولی عہد و وزیراعظم محمد بن سلمان تون اوڑدہی کرینے، ہڑتوم آ راہشونک واپار، زرکاری ، توانائی و سلامتی نا بشخ آتیٹی پاکستان و سعودی عرب نا نیام اٹ تعلقداری تے پین سوگو کننگ نا وڑوڈول آتیا بھرمی گپ وتران کریر۔ ترجمان پارے کہ وزیراعظم سعودی عرب نا کنڈآن پاکستان کن پدریسہ مخ تفی آ سعودی ولی عہد نا منت واری ءِ ہرفے۔ اوپارے کہ وزیراعظم نا دورہ ءِ پاکستان و سعودی عرب نا نیام اٹ تاریخی تعلقداری تے تالان کیک و دا دورہ تین پہ تینی افہام و تفہیم اٹ ودکی، واپار، زرکاری ٹی کمکاری ءِ ودفنگ و ہڑتوم آکنڈآتا ، علاقائی و جہانی باندات آتیا زیات سفارتی رابطہ کاری نا کسر ءِ آوار کیک۔
