کوئٹہ۔ 20 مارچ (اے پی پی) چیئرمین قائمہ کمیٹی دفاعی پیدوار سینیٹر محمد عبدالقادر تینا اسہ خصوصی بیان اٹی پارے کہ ملک انا بگڑینگوکآ داخلی حالیت آتا رداٹ غٹ سرکڑدہ عسکری و سیاسی شخصیت آک تین پہ تینی اختلاف آتے گیرام کرسا مون آ بریر و ملک انا امن و ایمنی ءِ بحال کننگ اٹ تینا تینا اہم کڑد ءِ ادا کیر، سیاسی شخصیت آک دہشت گردی آن بھاز زہمی خیبرپختونخوا و بلوچستان نا سفر ءِ کیر ، ہڑتوم آ صوبہ غاتا کماش و سرکڑدہ غاتون ملر ، اسہ ایلو ءِ پت اٹ ہلیر و تین پہ تینی کمکاری ءِ ودفسا دہشت گردی نا عفریت ءِ پورو وڑاٹ لتارڑ، حکومت ، اپوزیشن و ادارہ غاک م اواری اٹ ملک اکن گھمبیر ویل آتیان نجات نا کسر اس کشسا شونداری و شونہالی نا کنڈآ دننگ کیرہ ، چیئرمین قائمہ کمیٹی دفاعی پیدوار مستی پارے کہ ملک بے کچ نازرک دورہ غان گدرینگ انگ ءِ، پاکستان نا دشمن بھارت و اوغانستان نا دوتے اٹ گوازی کننگ ءِ، دشمنک ملک انا امن و سکون ءِ درینو، داوڑاٹ حکومت و اپوزیشن نا اجتماعی زمواری ءِ کہ او سیاسی اختلاف آتے ایڑتر تخسا تعمیری مذاکرات نا کمک اٹ ملکی ویل آتا ایسری اٹ پٹر، زیرک سیاست دان حکمت و مذاکرات نا کمک اٹ گھمبیر ویل آتا قابل عمل ایسر اس پٹرہ، غٹ سیاسی جماعت آک ملکی فائدہ غاتیٹی آل پارٹیز کانفرنس اٹی بشخ ہلیر، تینا تینا دست کمکاری ءِ ودفر، پاکستان سیاست دان تا پین تین پہ تینی نفاق ءِ سگنگ کپک، سیاستدان پاکستان نا غٹ داخلی و خارجی ویل آتا ایسر اس ڈائیلاگ اٹ ہی پٹنگ کیرہ۔
