لورالائی۔ 19 مارچ (اے پی پی) لورالائی داخلہ مہم نا چرجوئی ٹی گورنمنٹ گرلز ہائی اسکول کلی اوریاگی کاکڑان اٹی ریلی و آگاہی سیمینار اس اڈتننگا۔ اسکول نا دنگ اٹی شجرکاری مہم نا بناءِ کننگا۔ محکمہ تعلیم نا کنڈآن داخلہ مہم 2025نا چرجوئی ٹی گورنمنٹ گرلز ہائی اسکول کلی اوریاگی کاکڑان اٹی آگاہی سیمینار اس اڈتننگا۔ ہرانا مسخت طالب علم ، لمہ و باوہ و الس ءِ آب اٹ تعلیم نا اہمیت کننگ ئس۔ ریلی و سیمینار اٹی تعلیمی چاہندار، فیمیل استاد، لمہ و باوہ، طالب علم و سول سوسائٹی نا نمائندہ غاک پبی بشخ ہلکر۔ سیمینار آن تران کرسا ڈسٹرکٹ آفیسر ایجوکیشن بہادر شاہ ناصر ای ایس پی یونیسیف پروگرام منیجر عطاء اللہ ، ڈی پی ایم یونیسیف عبید ترین، ایم اینڈ ای آفیسر بی آرایس پی مس فرزانہ، ہیڈ مسٹریس میڈم عظمیٰ شاہین و ایلوفک پاریر کہ علم انا روشنائی ءِ ہرچنااسکان ، آب اٹ تعلیم ہر چنانا بنداوی حق ءِ ، و دامہم نا مسخت زیات آن زیات چناتے تعلیمی ادارہ غاتیٹی داخلہ ترفنگ ءِ، ایلو ترانکار آک تعلیم نا مون آ دننگ و پوسکن آ تدریسی آسراتی نا دوئی کننگ آ زور شاغار۔ دود اٹی بشخ ہلوک آک عزم ظاہر کریر کہ او تعلیم نا مون آدننگ کن ہرممکن کوشست کینہ و لمہ و باوہ غاتے چناتا روشنا آخبت کن زوت آن زوت داخلہ ترفنگ نا ترغیب ایترہ۔ سیمینار نا ایسر آ اسکول اٹی شجرکاری کننگا و غٹ بشخ ہلوک آتے شجرکاری نا اہمیت آن معلومدار کریر تانکہ اسکول نا پیشن گلی محلہ غاتیٹی ہم ہر اسٹ شجرکاری کننگ کے و دعاکننگا۔
