وزیراعظم شہباز شریف نا سعودی زرکارآتے آسراتی فراوان کننگ نا عزم انا درشان، توانائی ، انفراسٹرکچر ، کشت وکشار  و ٹیکنالوجی تون اوار چندی بشخ آتیٹی خصوصی زرکاری آسراتی کونسل نا رداٹ کاروباری وارخواہی آن فائدہ ہرفنگ نا سلہ

جدہ۔ 20 مارچ (اے پی پی) وزیراعظم محمد شہباز شریف سعودی زرکارآتے آسراتی فراوان کننگ کن پاکستان نا عزمانا درشانی ءِ کرسا توانائی، انفراسٹرکچر، کشت وکشار و ٹیکنالوجی تون اوار چندی بشخ آتیٹی خصوصی زرکاری آسراتی کونسل نا رداٹ کاروباری وارخواہی آن فائدہ ہرفنگ نا سلہ خلکنے۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف تون سعودی وزیرزرکاری خالد الفالح و جوائنٹ ٹاسک فورس اقتصادی مصروفیات نا سروک محمد التویجری اوڑدہی کرے۔ اوڑدہی ٹی اقتصادی کمکاری ءِ سوگو کننگ، پاکستان اٹ پین سعودی زرکاری اتنگ و اہم بشخ آتیٹی اسیجائی گام گیج آتے ترند کننگ آ گپ وتران کننگا۔ وزیراعظم سعودی  زرکارآتے آسراتی فراوان کننگ کن پاکستان نا عزم انا درشانی ءِ کرسا پاکستان نا سٹریٹجک پوزیشن و زرکاردوست پالیسی تے تالان کرے۔ اوتوانائی، انفراسٹرکچر ، کشت وکشار و ٹیکنالوجی ٹی پاکستان نا گیشتر لائخی آ زور شاغسا سعودی کاروباری ادارہ غاتے خصوصی زرکاری آسراتی کونسل (ایس آئی ایف سی) نا رداٹ کاروباری وارخواہی پٹنگ نا سلہ خلک۔ سعودی وزیر خالد الفالح و ٹاسک فورس انا سروک محمد التویجری پاکستان تون اقتصادی تعلقداری تے پین گہراکننگ اٹ سعودی عرب نا بھاز است خواہی نا درشانیءِ کرے۔ اوزرکاری نا ڈٹ آتے ترند کننگ و اوفتیا عملدرآمد ءِ پک کننگ کن ادارہ جاتی کمکاری ءِ ودفنگ آ گپ وتران کرے۔ فریق آک باقاعدہ و منظم رابطہ و اسیجائی ڈٹ آتیا ترندی اٹ عملدرآمدنا کمک اٹ پاکستان سعودی اقتصادی شریداری ءِ پین سوگو کننگ آ امنا کریر۔ اوڑدہی ٹی مریس مدی و تین پہ تینی وڑاٹ فائدہ ئی اقتصادی تعلقداری تے مون آ دننگ کن ہڑتوم آ ملک آتا عزم آ زور شاغنگا۔ دیوان اٹی وزیراعظم نا کمکاری کن نائب وزیراعظم و وزیرخارجہ محمد اسحاق ڈار ، وزیراعلیٰ پنجاب مریم نواز شریف، وزیر موسمیاتی بدلی مصدق ملک و نیشنل کوآرڈی نیٹر ایس آئی ایف سی لیفٹیننٹ جنرل سرفراز احمد ئسک ساڑی ئسر۔ سعودی ڈل اٹی سعودی وزارت زرکاری و سعودی عرب و پاکستان نا نیام اٹ اقتصادی تعلقداری کن اسیجائی ٹاسک فورس انا نمائندہ غاک اوار ئسر۔