جدہ۔ 20 مارچ (اے پی پی) وزیراعظم محمد شہباز شریف و سعودی عرب نا ولی عہد و وزیراعظم شہزادہ محمد بن سلمان پاکستان و سعودی عرب نا نیام اٹ ودوک اقتصادی کمکاری آ است جمی نا درشانی ءِ کرسا ڈیہہ اٹی امن، سوگوی و شونہالی کن تینا اسیجائی وژن ءِ مون آ دننگ کن ہرکہول آ اواری اٹ کاریم کننگ آ امنا کرینو۔ پی ایم آفس نا میڈیا ونگ آن جاری بیان نا رداٹ وزیراعظم محمد شہباز شریف سعودی عرب نا ولی عہد و وزیراعظم شہزادہ محمد بن سلمان تون اوڑدہی کرے، داوخت آ نائب وزیراعظم و وزیرخارجہ اسحاق ڈار، آرمی چیف جنرل سید عاصم منیر و وزیراعلیٰ پنجاب مریم نواز ئسک ہم ساڑی ئسر۔ اوڑدہی ٹی پاکستان و سعودی عرب نا نیا م اٹ سوگو و تاریخی تعلقداری نا اہمیت آ زور شاغنگا و اقتصادی ، واپاری، زرکاری، توانائی و دفاعی بشخ آتیٹی کمکاری ءِ ودفنگ آ گپ وتران کننگا۔ ہڑتوم آ راہشونک پاکستان و سعودی عرب نا نیام اٹ ودوک اقتصادی کمکاری آ است جمی نا درشانی ءِ کریر۔ وزیراعظم اہم بشخ آتیٹی زرکاری ءِ ودفنگ کن سعودی عرب نا عزم انا ستاءِ کرے ہرا پاکستان نا اقتصادی شونداری و سوگوی ٹی کمکار مریک۔ فریق آک علاقائی سلامتی نا ویل آتون مون تننگ کن اسیجائی کوشست آتا اہمیت امنا کرسا دفاعی و سیکورٹی کمکاری ءِ سوگو کننگ نا تینا عزم انا درشانی ءِ کریر۔ ہڑتوم آ راہشونک مون آ بروک علاقائی حالیت آتون اوار اوار ڈیہہ انا سیاسی منظرنامہ غا ہم گپ وتران کریر۔ اوڈیہہ اٹی امن، سوگوی وشونہالی کن تینا اسیجائی وژن ءِ مون آ دننگ کن ہرکہول آ اواری اٹ کاریم کننگ آامنا کریر۔ سعودی ولی عہد سعودی عرب اٹی پاکستانی کمیونٹی نا نمان خذمت آتا اعتراف ءِ کرے و اوفتا راجی آسودہی کن گام گیج آتے ودفنگ آ امنا کرے۔ ہڑتوم آراہشونک الس نا نیام اٹ رابطہ، دودوربیدہ ئی ہن وبر و تعلیمی کمکاری ءِ پین سوگو کننگ نا گرج آ زور شاغار ۔ وزیراعظم و ولی عہد تین پہ تینی شرف، اسیجائی فائدہ و شونداری وشونہالی نا اسیجائی وژن نا راہشونی ٹی پاکستان و سعودی عرب نا شریداری ءِ پوسکن آ بڑزی تسکان سرکننگ نا عزم انا درشانی ءِ کریر۔
