اسلام آباد۔19مارچ (اے پی پی):نائب مزن وزیر ءُ دری کارانی وزیر سینیٹر محمد اسحاق ڈار ءَ گوشت کہ شکر ءِ خوردہ بہا 164 کلدار بیت وھدیکہ ایشی ءِ ایکس مل ءِ بہا 159 کلدار ءَ چہ کم بیت۔ چار شمبے ءِ روچ ءَ ادا شکر ءِ بہا آنی چار ءُ تپاسی ءِ واستہ مزن تک ءِ دیوان ءِ سروکی ءَ پد ھاسیں پیسلہ آنی جار جنان ءَ نائب مزن وزیر ءَ گوشت کہ 178-180 کلدار ءَ شکر ءِ بہا کنگ نا پائیدار اِنت۔ آئی ءَ گوشت کہ ذیلی کمیٹی جوڑ کنگ بوھگ ءَ انت کہ یک ماہے ءِ تہ ءَ اے جیڈھ ءِ گیواری ءِ واستہ سفارشات پیش کنت۔ نائب مزن وزیر ءَ گوشت کہ مزن وزیر ءِ ہدایت ءِ رد ءَ شکر ءِ جیڈھ ءِ چار ءُ تپاسی ءِ واستہ جوڑ بوتگیں کمیٹی ءَ گوستگیں وھد ءَ ھم پاکیں ماہ رمضان ءِ ساھت ءَ شکر ءِ نہادانی تہ ءَ گیشی ءَ پد بازیں دیوان کتگ ات۔ آئی ءَ گوشت کہ 178-180 کلدار ءِ سر ءَ شکر ءِ بہا کنگ مزن وزیر ءُ حکومت ءِ واستہ ھچ وڑیں نھاد ءِ سر ءَ نہ اِنت آئی ءَ گوشت کہ راجی فوڈ سیکیورٹی ءُ پٹ ءُ پول ءِ وزیر رانا تنویر حسین ءِ سروکی ءَ یک ذیلی کمیٹی 19 اپریل ءَ چہ پیسر اے بابت ءَ وتی ھیال ءُ لیکہ ءَ دنت۔ آئی ءَ گوشت کہ شوگر ملز ایسوسی ایشن ءَ وتی سبب بیان کتگ انت ایشی ءِ سر ءَ ایشانی گوما سرجمیں رنگ ءَ گپ ءُ تران بوتگ۔ نائب مزن وزیر محمد اسحاق ڈار ءَ گوشت کہ مزن وزیر ءَ شکر ءِ نہاد آنی جیڈھ ءِ سر ءَ کمیٹی جوڑ کتگ کمیٹی ءِ دیوان ءَ نرخ آنی کنٹرول ءِ واستہ باقاعدہ گامگیج آنی سر ءَ چار ءُ تپاسی کنگ بوتگ ۔ آئی ءَ گوشت کہ شکر ءِ نھاد بار بار گیش بوھگ ءَ انت، ءُ رناتنویر حسین ءِ سروکی ءَ یک ذیلی کمیٹی یے جوڑ کنگ بوتگ کہ آ نھاد آنی سر ءَ چار ءُ تپاسی بہ کنت۔ 274 ارزانیں مارکیٹ آنی تہ ءَ شکر 130 کلدار ءِ سر ءَ سپلائی کنگ بوھگ ءَ اِنت۔ ملک ءَ شکر ءِ کمی نہ انت، ملزم کرشنگ سیزن ءَ وھد ءِ سر ءَ بندات کنت، وھدیکہ کرشنگ سیزن یکم نومبر ءَ چہ بندات بیت، خلاف ورزی ءِ ھلاپ ءَ کارروائی کنگ بیت۔ ایشی ءَ چہ پیسر گند ءُ نند ءَ راجی وردن ءِ سلامتی ءِ وفاقی وزیر رانا تنویر حسین، کانود ءُ انصاف ءِ وفاقی وزیر اعظم نظیر تارڑ، مزن وزیر ءِ مشیر ہارون اختر، شوگر ملز ایسوسی ایشن ءِ نمائندگ ءُ ہمگرنچیں مزنیں حکام ءَ بہر زرتگ ات۔
