وزیراعظم شہباز شریف ڈل اتون اوار سعودی عرب آ روانہ

اسلام آباد۔ 19 مارچ (اے پی پی) وزیراعظم محمد شہباز شریف بڑزکو کہولی ڈل اتون اوار 19آن 22 مارچ 2025اسکان سعودی عرب نا سرکاری دورہ کن روانہ مسنے۔ چارشنبے نادے آ وزیراعظم آفس نا میڈیاونگ آن جاری بیان نا رداٹ وزیراعظم نا دورہ ءِ سعودی عرب نا مسخت پاکستان و سعودی عر ب نا نیام اٹ ہڑتوم آ کنڈآتا تعلقداری تے سوگو کننگ، اقتصادی کمکاری ءِ ودفنگ و ہڑتوم آملک آتا نیام اٹ زرکاری ءِ مون آ دننگ ءِ۔ وزیراعظم تون اوار ڈل اٹی نائب وزیراعظم و وزیرخارجہ سینیٹر محمد اسحاق ڈار تون اوار اہم بنجائی وزیر آک و بڑزکو کمامدارآک اوار مریک۔ دورہ ٹی وزیراعظم نا سعودی ولی عہد و وزیراعظم محمد بن سلمان آل سعود تون اوڑدہی ہم گمانی ءِ۔ اوڑدہی ٹی ہڑتوم آ راہشونک واپار ءِ مون آدننگ ، اہم بشخ آتیٹی شریداری ءِ ودفنگ و گیشتر اقتصادی کمکاری ءِ آسان کننگ نا وڑوڈول آتیا گپ وتران کیرہ۔ ہڑتوم آ راہشون تا گپ وتران اٹی تین پہ تینی است خواہی نا امور بشمول جہانی و علاقائی حالیت خاص کر غزہ و دے ٹک  نیامی نا مون آ بروک حالیت آتون اوار اوار امت مسلمہ نا بابت ویل آک ایجنڈاٹی سرفہرست مریرہ۔ وزیراعظم نا دورہ ، پاکستان و سعودی عرب نا نیام اٹ گہراتاریخی تعلقداری تے تالان کیک، و ہڑتوم آ ملک آتا نیام اٹ تین پہ تینی افہام و تفہیم اٹی ودکی، واپار، زرکاری ٹی کمکاری ءِ ودفنگ و ہڑتوم آکنڈآتا ، علاقائی و جہانی باندات آتیا سفارتی رابطہ غاتا پین مون آ دننگ نا کسر ءِ آوار کیک۔