اسلام آباد ۔ 19 مارچ (اے پی پی) وزیراعظم محمد شہباز شریف 2025نا شجرکاری مہم نا بناءِ کرینے، شجرکاری مہم اٹی ہرچار آ صوبہ، آزاد کشمیر و گلگت بلتستان اٹی 4 کروڑ 17 لکھ نیال خلنگک وخت اس کہ وزیراعظم پارے کہ پاکستان موسمیاتی بدلی آن غٹ آن زیات زہمی 10 ملک آتیٹی اوار ءِ، درخت ننا چاگڑد ءِ گچین کننگ اٹ کمک ایتک، مچ آقوم و خاص کر ورناو بزغرآک زیات آن زیات شجرکاری مہم اٹی بشخ ہلیر۔ چارشنبے نادے آ داڑے اسہ دود اسے ٹی وزیراعظم نیال اس خلساشجرکاری مہم نا بناءِ کرے۔ داوخت آ تران کرسا وزیراعظم پارے کہ رحمت و برکت والا مقدس تُو روچہ مبارک اٹی 2025نا شجرکاری مہم نا بناءِ کننگانے ہراٹی ہرچارآ صوبہ غاتون اوار اوار آزاد کشمیر و گلگت بلتستان اٹی کم و ود 4 کروڑ 17 لکھ نیال خلنگ نا ڈٹ ءِ ہراٹی مچ آ قوم و خاص کر ورناو بزغرآک زیات آن زیات بشخ ہلیر۔ وزیراعظم پارے کہ درخت ننا چاگڑد ءِ گچین کننگ اٹ بھاز کمک ایتک۔ شجرکاری آن ناجوڑی و چاگڑدی کچٹی ٹی کمتی بریک۔ تدوک آ منہ سال آتیٹی مروک آموسمیاتی بدلی تا سوب آن شجرکاری نااہمیت پین ودانے انتئے کہ دنیا ٹی موسمیاتی بدلی رونمامسنے۔ 2022نا ترند انگا نوکاپ موسمیاتی بدلی نا سوب آن ہی بس و داٹی بھلو کچ اسے آ بھسکاری مس۔ بدبختی اٹ پاکستان موسمیاتی بدلی آن غٹ آن زیات زہمی 10 ملک آتیٹی اوار ءِ۔ دُن تو گرین ہاؤس گیس آتا پیش تمنگ اٹی پاکستان نا بشخ مفننگ نا بریبر ءِ۔ داسوب آن گرج دا ہیت انا ءِ کہ زیات آن زیات نیال خلنگے۔ ننے روچہ مبارک نا برکت آتیان فائدہ ہرفن، و ملک انا شونداری و شونہالی کن دے و نن خواری کین۔ انشاء اللہ پاکستان اسہ عظیم ءُ ملک اس جوڑ مریک۔ داکان بیدس بہارنا موسم 2025نا شجرکاری مہم اٹی پنجاب اٹی اسہ کروڑ 28 لکھ 70ہزار ،سندھ اٹی اسہ کروڑ، خیبرپختونخوا ٹی 26 لکھ 33 ہزار، بلوچستان اٹی 20 لکھ 62 ہزار، آزاد کشمیر اسہ کروڑ اسہ لکھ 47 ہزار و گلگت بلتستان اٹی 40 لکھ نیال خلنگ نا ہدف مقرر کننگانے۔
