اسلام آباد۔ 19مارچ (اے پی پی) چیئرمین سینیٹ سید یوسف رضاگیلانی نیشنل پریس کلب نا گچین کاری تیٹی جرنلسٹ پینل نا پوسکن گچین مروک آ صدر اظہر جتوئی،سیکرٹری نیئر علی و وقار عباسی ءِ فنانس سیکرٹری مننگ آمبارکباد پیش کرے و پوسکن گچین مروک آ سرکڑدہ غاتیکن نیک است خواہی نا درشانی ءِ کرینے۔ سینیٹ سیکرٹریٹ آن جاری بیان نا رداٹ چیئرمین سینیٹ پارے کہ نیشنل پریس کلب نا گچین کاری تیٹی پوسکن گچین مروک آ عہدیدار آتا سرسہبی اوفتا صحافی برادری نا پبی پت انا درشانی ءِ ۔ سید یوسف رضاگیلانی اومیت ظاہر کرے کہ نیشنل پریس کلب اسلام آباد نا پوسکن گچین مروک آ سرکڑدہ غاک میڈیا نا شونداری و صحافتی برادری نا پت آ پورو سلنگ و اوفتا ویل آتے ایسر کننگ کن تینا غٹ تر لائخی تے کاریم اٹ اتیک۔ اوپارے کہ السی ویل آتے اقتدار نا ایوان تسکان سرکننگ و ایوان اٹی الس نا راجی آسودہی کن مروک آ کانود سازی ءِ الس اسکان سرکننگ اٹ صحافتی برادری نا کڑد بھاز اہمیت تخک۔ چیئرمین سینیٹ پارے کہ او پریس کلب اسلام آباد نا پوسکن گچین مروک آ سرکڑدہ غاتا سرسہبی و کامرانی تیکن دعا گو ءِ۔
