اسلام آباد۔18مارچ (اے پی پی):ریلوے ءِ بنجاھی وزیر محمد حنیف عباسی ءَ وزارت ریلوے ءَ یک جامع مزن تک ءِ دیوان ءِ سروکی کت ایشی ءِ تہ ءَ درستیں کلیدی سٹیک ہولڈر آنی نیمگ ءَ بھر زوری بوت۔ اے گند ءُ نند ءِ مول ءُ مراد پاکستان ریلوے ءِ استیں کارکردگی ءِ چار ءُ تپاسی، دیم ءَ اتکگیں چیلنج آناں گیواری کنگ ءُ آیوکیں گہتری ءِ واستہ حکمت عملی جوڑ کنگ بوتگ۔ آئی ءَ زور پر دات کہ ریلوے آپریشن ءَ را جوانیں رنگ ءَ ءُ بے ھچ وڑیں تاخیر ءَ را سرجم کنگ سک باز المی اِنت۔ بنجاھی وزیر ءَ ٹرین ءِ وھد ءُ پاس ءَ را دل یکیمی کنگ ءُ مزنیں کوالٹی ءِ کارکردگی ءِ گوما سروسز ءِ پھجارینگ ءِ ہدایت کت آئی ءَ اے گپ ءِ سر ءَ زور پر دات کہ ریلوے آپریشن ءِ تہ ءَ مسافر آنی جان سلامتی ءُ ایمنی ءَ را مدام اولی ترجی ءِ تہ ءَ ھوار کنگ بہ بیت۔ آئی ءَ اسٹیشن ءُ ٹرین آنی سر ءَ گیش سیکورٹی گامگیج آنی ضلورت ءِ سر ءَ زور پر دات تانکہ ھرچ وڑیں نا شریں وئیل ءَ چہ بچگ بہ بیت۔ آئی ءَ ریلوے ءِ واکدار آناں ہدایت کت کہ آ نوکیں سیفٹی ٹیکنالوجی آناں وتیگ بہ کن اَنت ءُ ہر وھد ءَ مسافر آنی واستہ ایمنیں سفر ءَ را دل یکیمی کنگ ءِ واستہ ہنگامی تیاری ءَ را گہتر بہ کن اَنت۔ آئی ءَ اے گپ ءِ ذکر کت کہ نوکیں ءُ آرام دہ ٹرین آنی بندات ءَ گوں مسافر پاکستان ریلوے ءَ را وتی سفر ءِ واستہ ترجیحی گچین کاری جوڑ کت کن اَنت حنیف عباسی ءَ گیش گوشت کہ کسٹمر سروسز ءَ را گہتر کنگ ءِ سر ءَ دلگوشی دیگ بہ بیت ءُ درستیں اسٹیک ہولڈر آناں ہدایت کت کہ آ مسافر آنی ھوالگ ءَ پیشہ وارانہ رویہ ءِ سرا عمل بہ کن اَنت، وتی جست ءُ پرس ءِ پسو ءَ بہ دنت۔ پاکستان ریلوے ءِ اهمیت ءِ سر ءَ دلگوشی دات ءُ اہلکار آناں ہدایت کت کہ آ نجی شعبہ ءِ گوما شریکداری، مال برداری ءِ سروسز ءِ گہتری ءُ سیل ءُ سواد ءِ سروسز ءِ وسیلگ ءَ آمدنی ءِ نوکیں وسیلگ آنی شوھازگ ءَ بہ کن اَنت۔ آئی ءَ گوشت کہ پاکستان ریلوے وتی مزنیں نیٹ ورک ءُ راجدپتری میراث ءِ گوما اقتصادی دیمروئی ءُ چاگردی گہتری ءِ تہ ءَ ھاسیں کرد پیلو کت کنت آئی ءَ گوشت کہ پاکستان ریلوے جوانیں آپریشن، وھد ءُ پاس ءِ سروسز ءُ مسافر آنی سلامتی ءِ تہ ءَ جھان ءِ درجہ ءِ معیار جوڑ بہ بیت۔ آئی ءَ سرجمیں سٹیک ہولڈر آنی نیمگ ءَ چہ وعدہ کت کہ آ یکجائی ءَ پاکستان ریلوے ءَ را یک جھان ءِ درجگ ءِ ٹرانسپورٹ ءِ نظام جوڑ کنگ ءِ واستہ کار کن اَنت۔
