اسلام آباد۔ 18مارچ (اے پی پی) بنجائی سیکرٹری حوالکاری و شینکاری عنبرین جان و پرنسپل انفارمیشن آفیسر مبشرحسن نیشنل پریس کلب نا پوسکن گچین مروک آ صدر اظہر جتوئی، سیکرٹری نیئرعلی ، سیکرٹری خزانہ وقار عباسی تون اوار ایلو پوسکن گچین مروک آ عہدیدار آتے مبارکبادی ترسا اوفتے کن نیک است خواہی نا درشانی ءِ کرینے۔ سے شنبے نادے آ تینا بیان اٹی بنجائی سیکرٹری حوالکاری عنبرین جان پارے کہ نیشنل پریس کلب پاکستان اٹی صحافی برادری کن اسہ جوان ءُ پلیٹ فارم اسے ہرا آجوئی صحافت و صحافی تا حق اکن پدریسہ کوشست کننگ ءِ۔ اودااومیت نا درشانی ءِ کرے کہ پوسکن گچین مروک آ سرکڑدہ غاک تینا لائخی تے کاریم اٹ اتسا صحافی تا راجی آسودہی و میڈیانا شونداری کن جوان گام گیج کیرہ۔ پرنسپل انفارمیشن آفیسر مبشر حسن پارے کہ پوسکن آ دور انا چیلنج آتا رداٹ آجو،زموار و راستکی تیاتالان صحافت نا مون آ دننگ وخت انا گرج ءِ۔ ننے یقین ءِ کہ نیشنل پریس کلب دابابت تینا شاندار روایت آتے برقرار تخک۔ بنجائی سیکرٹری حوالکاری و پرنسپل انفارمیشن آفیسر پارے کہ وزارت حوالکاری و شینکاری نیشنل پریس کلب و صحافتی برادری تون ہرممکن کمکاری ءِ برجاتخنگ کن سنبرینگوک ءِ ، اومیت ءِ پوسکن آ سرکڑدہ نیشنل پریس کلب ءِ پین فعال و گچین کننگ اٹ اہم ءُ کڑد اس ادا کیک۔
