اسلام آباد۔ 18 مارچ (اے پی پی) بنجائی وزیر جان جوڑی سید مصطفیٰ کمال پارینے کہ پاکستان اٹی جان جوڑی نا بشخ اٹی زرکاری نا بھلو گمان اس ساڑی ءِ، حکومت پاکستان فارن زرکاری ءِ بخیر اٹ پاہک۔ داخیال آتا درشانی ءِ او ڈنمارک نا سفیر تون اوڑدہی ٹی کرے۔ ڈنمارک نا سفیر مصطفیٰ کمال ءِ وزارت جان جوڑی نا قلمدان ءِ سنبھالنگ آ مبارکبادی تس۔ اوڑدہی ٹی جان جوڑی نا بشخ ہڑتوم آ کنڈآتا کمکاری و تین پہ تینی است خواہی نا امور آ گپ وتران مس۔ سفیر ڈنمارک و پاکستان نا نانیام اٹ جان جوڑی نا بشخ اٹی برجا ڈٹ آتیان وزیر جان جوڑی ءِ معلومدارکرے۔ سید مصطفیٰ کمال پارے کہ پاکستان نا ڈنمارک تون متکن آتعلقداری و سوگو تعلقداری ءِ۔ پاکستان اٹی 33 ملین مخلوق شوگر نا گواچی ءُ۔ اوپارے کہ پاکستان ءِ جان جوڑی نا بابت متعدی و غیر متعدی مرض آتا دوہراچیلنج مون تروک ءِ۔ اوپارے کہ ڈنمارک گورنمنٹ امپورٹ نا جاگہ غا انسولین نا خام مال خواہفسا پاکستان اٹ پروڈکشن کے۔ حکومت زرکاری نا مون آدننگ کن غٹ تر گام گیج آتے پک کننگ ءِ۔ داوخت آ ڈنمارک نا سفیر پارے کہ ڈنمارک نا واحد کمپنی نوونورڈسک ہراپاکستان ءِ انسولین فراوان کیک، اولیکو ریسہ ٹی پاکستان اٹ ری پیکجنگ نا پلاننگ کننگءِ۔ اوپاکستان و ڈنمارک نا نیام اٹ جان جوڑی نا بشخ اٹی برجاکمکاری ءِ پین ودفنگ آامنا کرے۔
