اسلام آباد۔ 18 مارچ (اے پی پی) وزیراعظم محمد شہباز شریف 19آن 22 مارچ اسکان سعودی عرب نا سرکاری دورہ ءِ کیک۔ ترجمان دفترخارجہ نا کنڈآن سے شنبے نادے آ داڑے جاری بیان نا رداٹ وزیراعظم نا دورہ نا مسخت ہڑتوم آ کنڈآتا تعلقداری تے سوگو کننگ، اقتصادی کمکاریءِ ودفنگ و ہڑتوم آملک آتا نیام اٹ زرکاری ءِ مون آ دننگ ءِ۔ ڈل اٹی نائب وزیراعظم و وزیرخارجہ سینیٹر محمد اسحاق ڈار تون اوار اہم بنجائی وزیر و بڑزکو کمامدارآک ہم اوار مریرہ۔ دورہ ٹی وزیراعظم سعودی ولی عہد و وزیراعظم محمد بن سلمان تون اوڑدہی کیک۔ ہڑتوم آ راہشون واپار ءِ مون آ دننگ ، اہم بشخ آتیٹی شریداری ءِ ودفنگ و گیشتر اقتصادی کمکاری ءِ آسان کننگ نا وڑوڈول آتیا گپ وتران و سجفرہ۔ بیان اٹی مستی پاننگانے کہ تین پہ تینی است خواہی و تشویش نا امور بشمول جہانی و علاقائی پیش رفت خاص کر غزہ نا حالیت آتیان بیدس دے ٹک نیامی نا مون آ بروک حالیت آتون اوار اوار امت مسلمہ نا بابت ویل آک ایجنڈہ ٹی سرفہرست مریرہ۔ بیان نا رداٹ وزیراعظم نا دورہ ءِ پاکستان وسعودی عرب نا نیام اٹ تاریخی تعلقداری تے تالان کیک و تین پہ تینی افہام و تفہیم اٹ ودکی، واپار، زرکاری ٹی کمکاری ءِ ودفنگ و ہڑتوم آکنڈآتا ، علاقائی و جہانی باندات آتیا گیشتر سفارتی رابطہ غاتا کسر ءِ آوار کیک۔
