اسلام آباد۔ 18 مارچ (اے پی پی) وزیراعظم محمد شہبا زشریف پاکستان آن مون انگا زڑدوئی نا چٹفنگ کن بنجائی و صوبائی حکومت و غٹ اسٹیک ہولڈر آتا مربوط کوشست آتیا زور شاغسا وزیراعظم نا مون انگا زڑدوئی نا چٹفنگ نا پروگرام ءِ مچ آ ملک اٹی ودفنگ نا عزم انا درشانی ءِ کرینے۔ گلگت بلتستان اٹی وزیراعظم نا مون انگا زڑدوئی نا چٹفنگ نا قومی پروگرام نا پائلٹ پروجیکٹ نا سرسہب پوروی نا وخت آ سے شنبے نادے آ اڈ ہلوک دود آن تران کرسا وزیراعظم ملک اٹی داناجوڑی نا گیشتر اثرآتون مون تننگ کن دا گام انا اہمیت آ زور شاغا۔ اودارداٹ آغاخان خان ڈویلپمنٹ نیٹ ورک و جہانی ادارہ جان جوڑی(ڈبلیو ایچ او) نا نمان کمکاری نا ستاءِ کرسا پارے کہ زڑدوئی یونٹ بنائی وڑاٹ پاکستان کڈنی اینڈ لیور انسٹی ٹیوٹ اٹی جوڑ کننگاسس و اوکان پد دانا دنگ ءِ ایلو سرکاری ہسپتال آتسکان تالان کننگا ہراڑے ناجوڑ آتے 100 درسد مفت درمان نا آسراتی فراوان کننگک۔ وزیراعظم داہیت آ است ہسونی نا درشانی ءِ کرے کہ 2018ٹی ہراتم پوسکن آ حکومت اقتدار ءِ سنبھالا تو دا پروگرام ءِ بند کننگا ولے ای وزارت عظمیٰ نا منصب ءِ سنبھالنگ آن دمدستی پد داپروگرام دُوارہ بناکرے ہراداسہ وزیراعلیٰ مریم نواز نا کماشی ٹی پنجاب اٹی فعال ءِ۔ وزیراعظم پارے کہ ننے گلگت بلتستان و پاکستان نا ایلو بشخ آتا آخبت روشنا نظر بننگ ءِ۔ اودایقین نا درشانی ءِ کرے کہ ساڑی حکومت نا کوشست آتیان مون انگا زڑدوئی نا بھاز زوت ملک آن پوروخاتمہ مریک۔ اوپارے کہ داناجوڑی نا تالانی نا رداٹ ہنداوخت ءِ کہ داڑآ گچین وڑاٹ مون ءِ توننگ کن کوشست آتے کاریم اٹ اتنگے۔ اوپارے کہ بنجائی حکومت اسلام آباد اٹی جناح میڈیکل سینٹر جوڑ کننگ ءِ ہراجان جوڑی نا بشخ اٹی پاکستان نا جانز ہاپکنز ہسپتال ثابت مریک۔ داکان مست وزیراعظم گلگت بلتستان نا پائلٹ پروجیکٹ اٹی کمک کروک آتیٹی شیلڈ بشخا ہرافتے ٹی بنجائی وزیر ڈٹ بندی احسن اقبال، وزیر جان جوڑی مصطفیٰ کمال، وزیر مملکت جان جوڑی مختار احمد بھرتھ ، نادرا نا چیئرمین ، پاکستان اٹی ڈبلیو ایچ او نا نمائندہ و ایلوفک اوار ئسر۔ بنجائی وزیر ڈٹ بندی و شونداری احسن اقبال داوخت آ گپ وتران کرسا پارے کہ پاکستان مون انگا زڑدوئی بھاز ترندی اٹ تالان مننگ ءِ ہرا بے کچ گڑتی ناہیت اسے۔ اوپارے کہ مون انگا زڑدوئی پروگرام نا سرسہبی پرائیویٹ پبلک پارٹنر شپ و بنجائی و صوبائی حکومت آتا نیام اٹ کوآرڈی نیشن نا نمونہ ءِ۔ اوپارے کہ حکومت 2029اسکان دا مرض انا چٹفنگ کن پراومیت ءِ۔ وزیراعظم نا مون انگا زڑدوئی نا چٹفنگ نا پروگرام نئے بیرہ لکھ آ جون تے بچفک بلکن ملک انا زرگزرانی پیدواری لائخی ءِ ودفنگ اٹ ہم کمکار مریک۔ وزیر جان جوڑی سید مصطفیٰ کمال ملک آن مون انگا زڑدوئی نا چٹفنگ نا وزیراعظم نا وژن نا ستاءِ کرسا اودے 2030اسکان ملک آن دامرض انا سرسہبی اٹ چٹفنگ کن تینا پورو کمکاری نا باوری کرفے۔ پاکستان اٹ جہانی ادارہ جان جوڑی (ڈبلیو ایچ او) نا نمائندہ ڈاکٹر لوڈپینگ پارے کہ اونا ادارہ دا ناجوڑی نا پورو چٹفنگ کن داپروگرام نا مخ تفی ٹی پاکستان تون ہم کوپہ سلک۔ اوپائلٹ پروگرام نا بابت دمدستی گام گیج و شاندار سرکڑدہ ئی آ گلگت بلتستان و آزاد کشمیر نا حکومت و جان جوڑی نا محکمہ غاتا منت واری ءِ ہرفے۔ اوپارے کہ پائلٹ پروجیکٹ نا رداٹ اِرا یونین کونسل آتیٹی 14000بندغ آتا اسکریننگ قابل تحسین گام اسے۔ اوڈبلیو ایچ او نا ٹیکنیکل و آپریشنل سپورٹ نا باوری کرفے۔ وزیراعظم نا مون انگا زڑدوئی نا چٹفنگ نا پروگرام نا ٹاسک فورس انا باسک ڈاکٹر سعید اختر پارے کہ داپروگرام کن 68ارب روپئی جتا کننگانے ہرا اِرا ریسہ غاتیٹی پورو کننگک۔ داوخت آ بنجائی وزیر حوالکاری عطاء اللہ تارڑ و ایلو بڑزکو کمامدارآک ہم ساڑی ئسر۔
