اسلام آباد۔17مارچ (اے پی پی):وفاقی وزیر خزانہ ءُ آمدنی ءِ سینیٹر محمد اورنگزیب ءَ گوشت کہ مالیاتی، تجارتی ءُ نجی شعبہ ءِ اصلاحات ءِ واستہ وفاقی ءُ صوبائی تک ءَ یک پیم ءَ عمل درآمد کنگ ءِ یک جامع ءُ یکجاھیں حکمت عملی ءِ زورگ المی اِنت۔ آئی ءَ اے گپ دو شمبے ءِ روچ ءَ ادا وزارت ءِ ھزانگ ءِ ٹیم ءِ گوما ورلڈ بینک ءِ ٹیم ءِ گوما ھاسیں پیلو کنگ ءِ دیوان ءَ کت۔ گند ءُ نند ءَ پاکستان ءِ راجی دیمروئی ءُ مالی کمک ءِ پروگرام ءِ سر ءَ ھیال ریچی کنگ بوت ایش 10سالی ملکی شریکداری فریم ورک (سی پی ایف) ءِ بھر اِنت۔ اے رھبند ءِ چیر دستی ءَ ورلڈ بینک ءَ پاکستان ءِ کلیدی شوبگ آنی تہ ءَ 20ارب ڈالر ءِ سرمایہ کاری ءِ جزم کتگ، ایشی ءِ تہ ءَ جان سلامتی، وانگ ءُ زانگ، چاگردی پائیداری ءُ پائیدار دیمروئی ھوار اَنت۔ اے دیوان ءَ وزارت ءِ ھزانگ ءَ برجم دارگ بوت ایشی ءِ تہ ءَ وزارت ءِ ھزانگ ءُ فیڈرل بورڈ آف ریونیو ءِ مزنیں افسر آں بھر زوری کت۔ دیوان ءِ مستریں مول ءُ مراد اقتصادی اصلاحات ءِ واستہ ورلڈ بینک ءِ سرمایہ کاری ءِ مالی کمک ءِ ھوالگ ءَ جاری گپ ءُ تران ءَ را دیم ءَ برگ بوتگ۔ اے موہ ئَ ورلڈ بینک ئِ ٹیم ئَ راجی دیمروئی ئُُ مالی کمک ئِ پروگرام ئِ تیاری ئِ تہ ئَ پیشرفت ئِ بابت ئَ سرپد کت۔ پروگرام ءِ تہا جامع معاشی ءُ مالیاتی اصلاحات ءِ سرا احاطہ کنگ بوتگ، ایشی ءِ تہا شمولیت ءُ پائیدار دیمروئی ءِ تہا رکاوٹ آناں گیش کنگ ءِ حکمت عملی، آمدنی ءَ را گیش کنگ، ھرچ ءُ درچ ءِ کوالٹی ءَ را گہتر کنگ، ءُ سروس ءِ دیم دیگ ءِ تہا شفافیت ءُ کارکردگی ءَ را گیش کنگ ءِ حکمت عملی ھوار انت۔ اصلاحات ءِ مستریں مول ءُ مراد نجی شعبہ ءِ پیداواری سرمایہ کاری ءِ ھاتر ءَ سازگاریں چاگرد ءِ جوڑ کنگ ءُ منصفانہ دیمروئی ءِ مول ءُ مراد ءِ ھاتر ءَ سرکاری وسیلگ آناں ھرچ کنگ اِنت۔ ورلڈ بینک ءِ ٹیم ءَ وزیر خزانہ ءَ را بجٹ ءَ پیسر ءِ مشاورت ءِ وھد ءَ جتا جتائیں چیمبر، تجارتی ادارگ ءُ انجمن آنی نیمگ ءَ چہ رستگیں پالیسی ءِ سوج ءُ سفارش آنی تجزیہ ءِ بابت ءَ ھم سرپدی دات۔ اے مشاورت ءِ مول ءُ مراد حکومت ءِ بجٹنگ ءِ عمل ءَ را مھکم کنگ ءُ سرجم کنگ اِنت کہ اے سال ءِ جنوری ءَ بندات کنگ بوتگ ات کہ ایشی ءِ تہ ءَ اقتصادی نقطہ نظر ءِ سر ءَ جوانیں آمدنی ءِ پالیشی جوڑ کنگ بہ بیت۔ وزیر خزانہ سینیٹر محمد اورنگزیب ءَ گند ءُ نند ءِ ساھت ءَ زور پر دات کہ مالیاتی، تجارتی ءُ نجی شعبہ ءِ اصلاحات ءِ واستہ یک جامع ءُ یکجاھیں حکمت عملی ءِ زورگ المی انت کہ وفاقی ءُ صوبائی تک ءَ یک پیم ءَ کارمرد کنگ بہ بیت۔ آئی ءَ انسانی دیمروئی ءُ چاگردی ءُ اقتصادی گہتری ءِ گوما کارکردگی ءِ سر ءَ بنیات ءِ اشاریہ آنی گوما سیادی داروکیں اصلاحات آنی ڈیزائن کنگ ءِ ارزشت ءِ سر ءَ زور پر دات۔
