اسلام آباد۔ 17مارچ (اے پی پی) وزیراعظم محمد شہباز شریف پارینے کہ پاکستان نا آئی ٹی بشخ انا لائخ آ افرادی قوت اٹی جہانی مارکیٹ اٹی مسابقتی بنداو آ کاریم کننگ نا کچ ساڑی ءِ، آئی ٹی نا بشخ اٹی 25ارب ڈالر نا برآمد آتا ہدف نا دوئی کننگ کن آئی ٹی کمپنی تے غٹ آسراتی فراوان کننگ انگ ءِ۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ اوداخیال آتا درشانی ءِ ممتاز امریکی ملٹی نیشنل آئی ٹی کمپنی ایفینیٹی نا سی سی او جیرومی کیپیلس نا کماشی ٹی 4 باسکی ڈل اتون گپ وتران کرسا کرے ہرا وزیراعظم تون داڑے اوڑدہی کرے۔ اوڑدہی ٹی بنجائی وزیر آئی ٹی شزا فاطمہ خواجہ و تعلقدار ادارہ غاتا بڑزکو سرکاری آفیسر آک ساڑی ئسر۔ وزیراعظم ایفینیٹی نا پاکستان نا آئی ٹی بشخ اٹی پین زرکاری ٹی است خواہی نا ستاءِ کرے و ایفینیٹی پاکستان ءِ قومی و جہانی صارف آتیکن پاکستان اٹ جہانی آب انا کارل سینٹر اس جوڑ کننگ نا سلاہ تس۔ وزیراعظم پارے کہ ملک انا لائخ آ ورناتے آئی ٹی، اے آئی و ایلو پوسکن آ تکنیکی لائخی تیان شپ کننگ نا پروگرام نا تینٹ چاروکی ءِ کننگ اٹی اُٹ۔ آئی ٹی نا بشخ اٹی 25 ارب ڈالر نا برآمد آتا ہدف نا دوئی کننگ کن آئی ٹی کمپنی تے غٹ آسراتی فراوان کننگ انگ ءِ۔ ڈل پاکستانی آئی ٹی بشخ اتون تعلق تخوک آ بندغ آتا قابلیت و بشخ انا شونداری کن اوفتا خواری نا ستاءِکرے۔ جیرومی کیپیلس پارے کہ پاکستان نا آئی ٹی بشخ زرکاری و کاروبار کن بھاز جوان ءِ، داوخت آ ایفینیٹی پاکستان اٹ 1000آن زیات بے کچ لائخ آ و قابل پاکستانی چاہندار کاریم کننگ ءُ۔ پاکستانی ورناتیٹی آئی ٹی نا بشخ انا شونداری کن کاریم کننگ نا بے کچ ، کچ ارے، پاکستان نا کسبی و تربیت یافتہ افرادی قوت نا سوب آن ہی ایفینیٹی ڈیہہ انا سرسہب کمپنی ءِ۔
