اسلام آباد۔16مارچ (اے پی پی):مزن وزیر محمد شہباز شریف ءَ انسانی سوداگری ءَ ہواریں یک گروہ ءِ سروک ءِ دزگیر کنگ ءِ ھاتر ءَ وفاقی پٹ ءُ پولی ادارگ ءُ انٹیلی جنس بیورو ءِ کارندہ آناں توسیپ کتگ ءُ گوشت کہ انسانی سوداگری ءِ جرم ءِ مرتکب آنی سر ءَ کارروائی کنگ حکومت ءِ اولی ترجی اِنت۔ . آئی ءَ اے ھیالانی درشانی یک شمبے ءِ روچ ءَ وفاقی پٹ ءُ پولی ادارگ ءُ انٹیلی جنس بیورو ءِ کارندہ ءُ افسر آنی گوما گند ءُ نند ءِ ساھت ءَ کت۔ اے موہ ءِ سر ءَ وزیر داخلہ ءُ سیکرٹری داخلہ ھم ساڑی ات۔ مزن وزیر شہباز شریف ءَ گشتگ کہ جاجہ بینگ ءِ دزگیر کنگ ستا کرز انت ۔ انسانی سوداگری ءِ کاروبار ءَ ہواریں عناصراں نہ ایوک ءَ پاکستان ءِ بدنام کتگ بلکیں مراکش ءُ یونان ءِ کش ءُ گوراں بازیں مردمے کشتیانی تہا ڈوبگ ءِ سوب جوڑ بوتگ۔ مزن وزیر ءَ گوشت کہ لھتیں ماہ ءَ چہ اے ھرابیں ھال آنی پد ءَ جتا جتائیں جاھاں پاکستان ءِ نام گرگ بوتگ گڑا بے درور شرمندگی ءِ گپ اِنت۔ آئی ءَ گوشت کہ اے سیاہیں کاروبار سرجمی ءَ بند کنگ بہ بیت۔ مزن وزیر شہباز شریف ءَ گوشت کہ وزارت داخلہ، ایف آئی اے ءُ آئی بی ءِ کارندہ آنی کوشست ستا کرز انت کہ انسانی دزگیری ءِ ھلاسی ءِ واستہ کار کنگ ءَ انت۔ آئی ءَ گوشت کہ تئی اے کار آنی تہ ءَ چہ اے گپ پدر بیت کہ تو اے رنگیں وئیل آنی سبب ءَ بوتگیں تاوان ءَ چہ سرپد ئے۔ لانچ ءِ ڈوبگ ءِ وئیل آنی سبب ءَ بازیں گران بہائیں جانی پمیشکگ بوتگ ءُ ملک ءِ شریں نام ءِ سرا ہم رنگ ءُ پاس کپتگ۔ آئی ءَ ہدایت کت کہ پاکستان ءِ عزت ءُ شرپ ءِ بحالی ءُ برز کنگ ءِ واستہ ھمک رنگ ءِ کوشست کنگ بہ بیت، ایشی ءِ واستہ سرجمیں راج شمئے واستہ دعا کنت ءُ شمارا عزت ءُ شرپ ھم رس ایت۔ مزن وزیر ءَ را عثمان جاجہ نامیں مردمے ءِ دزگیر کنگ ءِ ھوالگ ءَ سرپد کنگ بوت کہ آ 19 کیس آنی تہ ءَ لوٹائینگ بوتگ ءُ انسانی دزگیری ءِ تہ ءَ مستریں ملزم بوتگ۔ مزن وزیر محمد شہباز شریف ءَ ایف آئی اے ءُ آئی بی ءِ کارندہ آنی گوما گپ ءُ تران ءِ گڈسرا یک رندے آھاں مبارکی دات ءُ گوشت کہ اے جوانیں کار ءَ بھر زوروکاں ادا دعوت دیگ بوتگ تانکہ راج ءَ را گْوشگ بہ بیت کہ آیاں بے دروریں جوانیں کارے کتگ۔ آئی ءَ گوشت کہ شما درستاں وتی زمہ واری آنی لوٹ پیلو کنان ءَ ملک ءِ شرپ ءَ را گیش کتگ ۔ مزن وزیر ءَ ہدایت کت کہ انسانی دزگیری ءِ گر ءُ دار ءِ کار برجاہ بہ بیت سرجمیں راج ءُ من شمئے سرجمیں کمک ءَ کناں تانکہ انسانی دزگیری ءِ کاروبار ءَ را سرجمی ءَ ہلاس کنگ بہ بیت۔ گند ءُ نند ءِ گڈ ءَ تہی کارانی وزیر مملکت ءَ سینیٹر طلال چوہدری ءَ سیادی داروکیں کارندہ آناں مزن وزیر ءَ گوں پجار کت، وھدیکہ وفاقی وزیر ءِ اھوالکاری ءُ نشریات عطا اللہ تارڑ ءُ سیکرٹری تہی کار ھم گند ءُ نند ءَ ساڑی اتنت۔ گند ءُ نند ءِ گڈ ءَ مزن وزیر محمد شہباز شریف ءَ انسانی دزگیری ءِ آپریشن ءَ بھمک زوروکیں افسر آناں انعام ءِ چیک ءُ شیلڈ ھم دات انت۔ گند ءُ نند ءِ ساھت ءَ مزن وزیر ءَ را انسانی ٹریفکنگ ءِ ھلاسی ءِ ھوالگ ءَ ھم بریفنگ دیگ بوت۔
