اسلام آباد۔ 14مارچ (اے پی پی) بنجائی وزیر ڈٹ بندی، شونداری ، اصلاحات و خصوصی گام گیج احسن اقبال پارینے کہ اسلام اٹی شدت پسندی و انتہاپسندی نا ہچءُ گنجائشت اس اف ، ہرقوم اخلاقی قدر، خواری و جہد اٹ دنیاٹی باوقار ہنداس دوئی کننگ کیک، اسلاموفوبیا نا گچین مقابلہ ءِ نن تینا اعمال آتے اٹ ہی کننگ کینہ۔ داخیال آتا درشانی ءِ او جمعہ نادے آ داڑے اسلاموفوبیا تون مون تننگ کن اقوام متحدہ نا جہانی دے انا وخت آ اڈ ہلوک سیمینار آن تران کرساکرے۔ احسن اقبال پارے کہ اسلام امن ورواداری نا مذہب ءِ۔ اسلام اٹی شدت پسندی و انتہاپسندی نا ہچ ءُ گنجائشت اس اف۔ ہرقوم اخلاقی قدر، خواری و جہد اٹ دنیا ٹی باوقار ءُ ہنداس دوئی کننگ کیک۔ احسن اقبال پارے کہ مذہب نا پن آ انتہاپسندی ءِ اسُل منپنہ۔ تعلیم نا کمک اٹ ہی قومک مون آ ہِننگ کیرہ۔ بغداد، اندلس و گرینا ڈانا یونیورسٹی تینا وخت انا ہارورڈ، سٹینفورڈ و آکسفورڈئسر۔ ولدا کرارکرار آ مسلمان تعلیم آن مرمس۔ دنیا نا بڑزکو انگا یونیورسٹی تیٹی اسلامک سٹڈیز نا پروفیسر یہودی اس مریک یا عیسائی ئس۔ ننتون اسلامی علم انا بشخ اٹی پروفیسر آتا کمتی ءِ۔ احسن اقبال پارے کہ اسہ سیاسی جماعت اس مذہب نا کارڈ ءِ گوازی کرسا زرگزران ءِ بھس کرے۔
