اسلام آباد۔ 14 مارچ (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ جی ایس پی پلس نا آسراتی نا پوسکنی کن یورپی دارالحکومت آتون پین فعال رابطہ غاتاگرج ءِ، جی ایس پی پلس بروک آ سال آتیٹی پاکستان نا یورپی یونین تون واپاری تعلقداری کن اہم ءِ۔ اوداہیت ءِ جمعہ نادے آ یورپی یونین نا سفیر ڈاکٹر راینا کیونکا تون اوڑدہی ٹی پارے، اوڑدہی ٹی ہڑتوم آ راہشونک تین پہ تینی است خواہی نا چندی امور خاص وڑاٹ یورپی یونین و پاکستان نا نیام اٹ کاروباری و زرکاری نا تعلقداری تے پین سوگو کننگ آ گپ وتران مس۔ او پاکستان اٹی یورپی کاروباری ادارہ غاتیکن وارخواہی تا ہم جاچ ءِ ہلک و زرکاری کن سازگار چاگڑد نا گرج آ زور شاغا تانکہ ودوک آکاروباری وارخواہی تے پبی وڑاٹ کاریم اٹ اتنگ مرے۔ ڈاکٹر کیونکا پارے کہ یورپی یونین پاکستان اٹ کاریم کروک300آن زیات یورپی کمپنی تا احاطہ کرینے و اوفتا خیال اٹی پین کمپنی ہم داڑے ساڑی ءُ۔ ڈاکٹر کیونکا نیوز یر خزانہ ءِ یورپی یونین مشن نا کنڈآن اسلام آباد اٹی مئی 2025نا نیام اٹ اڈ ہلوک کاروباری و زرکاری فورم اٹی بشخ ہلنگ نا سلہ ہم خلک و پارے کہ فورم پاکستان اٹ یورپی کاروباری زرکاری ءِ مون آ دننگ و یورپی کاروباری ادارہ غاتے ملک اٹی راغب کننگ آ چکار کننگک اوپارے کہ یورپی کمپنیک پاکستان ءِ کاروباری وارخواہی تیکن اسہ اہم مرکزنا وڑاٹ ہُننگ ءِ۔
