اسلام آباد۔ 13مارچ (اے پی پی) وزیر مملکت قومی جان جوڑی ڈاکٹر مختار احمد بھرتھ پارینے کہ شار تا تہہ ٹی کچہ انگا آبادی تیٹی خاہوتی ڈٹ بندی نا آسراتی تا فراوانی ءِ پک کننگے، ملک اٹی ودوک آ آبادی نا توننگ کن گورنمنٹ و پرائیویٹ سیکٹرآتے اواری اٹ کاریم کروئی مریک۔ داخیال آتا درشانی ءِ او گرین سٹار نا چیف ایگزیکٹیو آفیسر تون اوڑدہی ٹی کرے۔ سی ای او گرین اسٹار ڈاکٹر مختار احمد بھرتھ ءِ وزیر مملکت نا عہدہ ءِ سنبھالنگ آمبارکبادی تس۔ اوڑدہی ٹی جان جوڑی و بہبود آبادی نا انضمام آ گپ وتران کننگا۔ ڈاکٹر مختار احمد بھرتھ پارے کہ ملک اٹی ودوک آ آبادی اسہ بھلو چیلنج اسے ، فیملی پلاننگ نا بارواٹی شعور بیدار کننگ و اڑزان مانع حمل نا ذریعہ ءِ پک کروئی مریک۔ داوخت آ سی ای او گرین اسٹار پارے کہ پنجاب اٹی 130 و کے پی کے ٹی 70 چناو لمہ سینٹر جوڑ کرینے، ہراڑے خاہوتی ڈٹ بندی نا آسراتی ساڑی ءِ۔ وزیر مملکت دا گام ءِ ستاکڑزوک گوندسا پارے کہ داوڑنا پین سینٹر ایلو صوبہ غاتیٹی ہم بایدے جوڑ مرے۔
