اسلام آباد۔ 13مارچ (اے پی پی) پاکستان بھارتی حکومت نا کنڈآن تینا غیرکانودی وڑاٹ کوزہ ٹی جموں وکشمیر اٹی پنی آ سیاسی و مذہبی راہشون میر واعظ عمر فاروق نا کماشی ٹی عوامی ایکشن کمیٹی و جموں و کشمیر اتحاد المسلمین ءِ پنچ سال اکن غیرکانودی گوندنگ نا فیصلہ نا ترندی اٹ مذمت ءِ کرینے۔ دفترخارجہ نا ترجمان شفقت علی خان پنچ شنبے نادے آداڑے ہفتہ وار پریس حوال اٹی پارےکہ عوامی ایکشن کمیٹی نا سرکڑدہ ئی ءِ میر واعظ عمر فاروق کننگ ءِ وخت اس کہ جموں وکشمیر اتحاد المسلمین نا بنداو اسہ پین قابل ذکر سیاسی ومذہبی راہشون مولانا محمد عباس انصاری ایماندار تخاسس ہرا 2022اٹی تینا کزیت اسکان اونا کماشی ءِ کرے۔ اوپارے کہ بھارتی کمامدارآتا ساڑی آ فیصلہ غان کالعدم کشمیری سیاسی جماعت و تنظیم تا جم کچ 16 مسنے۔ ترجمان پارے کہ چندی سیاسی جماعت و تنظیم تیا پابندی خلنگ بھارت نا غیرکانودی وڑاٹ کوزہ ٹی جموں وکشمیر اٹی بھارتی کمامدارآتا بے کچ سخت رویہ نا اسہ پین درشانی اسے۔ اوپارے کہ دا گام سیاسی سرجز و اختلاف رائے ءِ توننگ نا است خواہی ءِ ہم پاش کیک۔ دفترخارجہ نا ترجمان پارے کہ دا جمہوری اصول و جہانی انسانی حق انا کانود نا سراسر بے چکاری ءِ ہم ظاہر کیک۔ اوبھارتی حکومت آن خواست کرے کہ او کشمیری سیاسی جماعت آتیا خلوک پابندی تے اینک کے، غٹ سیاسی بندی تے یلہ کے و جموں وکشمیر نا بارواٹی اقوام متحدہ نا سلامتی کونسل نا قرارداد آتیا عملدرآمدکے۔
