اسلام آباد۔ 13مارچ (اے پی پی) وزیراعظم محمد شہباز شریف پاکستان و ازبکستان نانیام اٹ واپاری کچ ءِ 2 ارب ڈالر اسکان ودفنگ کن روڈ میپ اس تیار کننگ نا گرج آ زور شاغانے۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف تون ازبکستان نا سفیر علی شیر تختائف وزیراعظم ہاؤس اٹی اوڑدہی کرے۔ وزیراعظم ازبک سفیر نا کمک اٹ صدر ازبکستان شوکت مرزایوف کن نیک است خواہی نا درشانی ءِ کرے و تدوک آتُو تاشقند نا دورہ ٹی اونا وپاکستانی ڈل انا مہمانداری کن است انا حب اٹ منت واری ءِ ہرفے۔ وزیراعظم تینا دورہ ٹی ہڑتوم آ ملک آتا نیام اٹ ہڑتوم آ کنڈآتا تعلقداری آ مروک آ شاندار پیش رفت آ است جمی نا درشانی ءِ کرے، ہراٹی بڑزکو کہولی اسٹریٹجک کمکاری کونسل نا ٹہیفنگ تون اوار اوار چندی بشخ آتیٹی چندی اہم معاہدہ و مفاہمتی یات داشت آتیا دستخط ہم اوار ءِ۔ وزیراعظم پارے کہ تاشقند آن پدی بننگ آ اوتعلقدار بشخ آتا وزیر آتے زمواری تسنے کہ او دورہ ٹی مروک فیصلہ غاتیا دمدستی عملدرآمد ءِ پک کیر۔ اوخاص وڑاٹ کانڑکنی و معدنیات ، ریلوائی(بشمول ٹرانس اوغان ریلوائی پروجیکٹ)، خصوصی اقتصادی زون، بینکنگ ، سیل و سوات، دودوربیدہ وقابل تجدید توانائی ٹی ازبکستان تون کمکاری ءِ ودفنگ اٹ پاکستان نا است خواہی ءِ مون آتخا۔ وزیراعظم ہڑتوم آکنڈآتا واپارءِ 2 بلین ڈالر اسکان ودفنگ آ کاریم کننگ کن اسہ روڈ میپ اس جوڑکننگ نا گرج آ ہم زور شاغا، ہراڑا دورہ ٹی ہڑتوم آ راہشون تا نیام اٹ امنا کننگاسس۔ ازبک سفیر وزیراعظم نا نیک است خواہی آ منت واری ءِ ہرفے و پارے کہ صدر شوکت مرزایوف پاکستان تون ازبکستان نا تعلقداری تے سوگو کننگ و ہڑتوم آملک آتا نیام اٹ گچین سیاسی تعلقداری تے تین پہ تینی وڑاٹ فائدہ ئی اقتصادی تعلقداری ٹی بدل کننگ کن سنبرینگوک ءِ۔ اوداہم پارے کہ صدر مرزایوف اینخوناسال انا ایسر اٹی پاکستان نا سرکاری دورہ ءِ کننگ نا وزیراعظم نا سلہ ءِ قبول کرینے، ہراڑکن تاریخ آتا تعین آ فریق آتا نیام اٹ گپ وتران برجاءِ۔
