اسلام آباد۔ 19 فروری (اے پی پی) وزیراعظم نا کمکار موسمیاتی بدلی و چاگڑدی رابطہ رومینہ خورشید عالم پارینے کہ چاگڑدی چیلنج آتا مقابلہ ءِ کننگ کن جوان ءُ حکمت عملی اسے نا گرج آ زور شاغسا پارے کہ چاگڑدی تنکی نا اثر بیرہ چاگڑد آ تمپک بلکن دا زرگزرانی ، راجی و دودوربیدہ ئی بشخ آتے ہم زہمی کیک۔ داخیال آتا درشانی ءِ او چارشنبے نادے آ داڑے صنفی حساس و چاگڑدی گام گیج آتا بابت اڈ ہلوک ورکشاپ آن تران کرساکرے۔ رومینہ خورشید عالم داہیت آ زور شاغا کہ چاگڑدی پائیداری ءِ پک کننگ کن راج انا غٹ بندغ آتے اواری اٹ کاریم کروئی مریک خاص وڑاٹ زالبول آتے دا عمل اٹ مرکزی کڑد اداکروئی مرے۔ اوپارے کہ زالبول چاگڑدی بدلی نا اثرآتیان زیات زہمی مریرہ و اوفتے دابابت آگاہی و تعلیم تننگ المی ءِ تانکہ او تینا خاہوت وکمیونٹی ءِ گچین وڑاٹ رکھ تننگ کیر۔ اوپارے کہ موسمیاتی آفت آتا انفراسٹرکچر، روزگار و پسماندہ کمیونٹی تیا تباہ کن اثرمرتب مریک۔ دا آفت آتا سوب آن غذائی کمتی، صنفی بیدادی و کم وئی نا برام تیٹی ودکی مریک ہراکہ اسہ بھلو ویل اسے۔ رومینہ خورشید عالم 2022نا نوکاپ نا ذکر ءِ کرسا پارے کہ داآفت ملک ءِ بھاز مالی نسخان تس، پاکستان نا جہانی کاربن اخراج آن 1 درسد آن ہم کم بشخ ءِ ولدا ہم ملک موسمیاتی تنکی نا ترند انگا نتیجہ غاتون مون تننگ ءِ۔ اوپارے کہ جہانی کہول آ گچین چاگڑدی گام گیج و کمکاری نا گرج ءِ تانکہ موسمیاتی بدلی نا مقابلہ و اونا اثرآتے کم کننگ مرے۔
