وزیراعظم نا بارکھان اٹی دہشت گردی نا کارروائی ٹی بس انا مسافر آتا زوال کننگ آ ڈکھیائی نا درشان، کودک شاری تا جون ومال ءِ نسخان تروک آتے بھلو قیمت اس اداکروئی تمک، محمد شہبا ز شریف

اسلام آباد۔ 19 فروری (اے پی پی) وزیراعظم محمد شہباز شریف بلوچستان ناشار بارکھان اٹی دہشت گرد آتا کارروائی ٹی بس انا مسافر آتا زوال کننگ آ ڈکھیائی نا درشانی ءِ کرینے۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم زوال کروک آ بندغ آتیکن بخشش نا دعا و خاہوت آتیکن صبر وجمیل نا دعاکرے۔ وزیراعظم ڈوہدار آتے زوت آن زوت اوفتے اوفتا کروک نا سزاتننگ نا پارت کرسا پارے کہ کودک شاری تا جون و مال ءِ نسخان تروک آتے بھلو قیمت اس اداکروئی تمک۔ کودک شاری تا قربانیک زیان مفسہ۔ وزیراعظم پارے کہ حکومت و سیکورٹی فورس آک ملک آن دہشت گردی نا پورو چٹفنگ کن لگوک ءُ۔