پاکستان سی پیک ڈٹ آتیا عملدرآمد کن چین اتون اواری اٹ کاریم ءِ برجاتخنگ کن سنبرینگوک ءِ، وزیراعظم شہباز شریف نا چینی سفیر تون اوڑدہی ٹی گپ وتران

اسلام آباد۔ 24 جون (اے پی پی) وزیراعظم محمد شہباز شریف پارینے کہ پاکستان سی پیک ڈٹ آتیا عملدرآمد کن چین اتون اواری اٹ کاریم ءِ برجاتخنگ کن سنبرینگوک ءِ، چین نا کنڈآن مالی و اقتصادی کمک اٹ پاکستان نا زرگزران ءِ سوگو کننگ اٹ کمک رسینگا ہرانا نتیجہ ٹی ملک انا میکرواکنامک آؤٹ لک اٹی گچینی بس۔ سے شنبے نادے آ وزیراعظم آفس نا میڈیا ونگ انا کنڈآن جاری بیان نار داٹ داخیال آتا درشانی ءِ وزیراعظم پاکستان اٹی چین نا سفیر جیانگ زیڈونگ تون گپ وتران کرساکرے ہرا داڑے اوڑتون اوڑدہی کرے۔ وزیراعظم چینی صدر شی جن پنگ و چین نا وزیراعظم لی کیانگ کن نیک است خواہی و بروک آ ایس سی اوس روکی دیوان نا سرسہب اڈتننگ کن نیک است خواہی تا درشانی ءِ کرے۔ اوسروکی دیوان اٹی بشخ ہلنگ کن تینا دورہ ءِ چین نا بابت ہڑتوم آملک آتا نیام اٹ برجا سلابت ناذکر ءِ ہم کرے۔ وزیراعظم محمد شہباز شریف پاکستان و چین نا نیام اٹ تاریخی، گہری و آہنی ’’آل ویدر اسٹریٹجک کوآپریٹیو پارٹنر شپ ‘‘ نا ذکر ءِ کرسا پارے کہ پاکستان سی پیک نا برجاڈٹ آتا سرسہب نفاذ کن چین اتون اواری اٹ کاریم ءِ برجاتخنگ کن پورو وڑاٹ سنبرینگوک ءِ۔ داچرجوئی ٹی او اہم ڈٹ بشمول کے کے ایچ ، ایم ایل ۔ون و گوادر پورٹ ءِ آپریشن کننگ تون اوار اوار کشت وکشار، صنعت و آئی ٹی نا بشخ آتیٹی ہڑتوم آملک آتا نیام اٹ کمکاری ءِ مون آتخا۔ وزیراعظم چین نا کنڈآن مالی و اقتصادی کمک کن پاکستان نا کنڈآن است انا حب اٹ سنگت ملک چین انا ستاءِ کرے ہراڑآن پاکستان نا زرگزران ءِ سوگو کننگ اٹ کمک رسینگا و اوٹی ملک انا میکرواکنامک آؤٹ لک اٹی گچینی بس۔ اومستی پارے کہ دا حکومت نا راجی و اقتصادی شونداری نا ایجنڈاکن اہم ءِ۔ اوڑدہی ٹی علاقائی سلامتی نا حالیت خاص کر ایران اسرائیل جھیڑہ ٹی ساڑی آ پیش رفت آ ہم گپ وتران کننگا۔ چینی سفیر مذاکرات و سفارتکاری نا کمک اٹ تنکی نا پرامن ایسری کن اقوام متحدہ نا سلامتی کونسل تون اوار ہرسفارتی فورم آ پاکستان نا فعال و مثبت کڑد انا ستاءِ کرے۔ چینی سفیر جیانگ زیڈونگ وزیراعظم ءِ پاک چین ہڑتوم آ کنڈآتا کمکاری نا چندی پلوآتیان معلومدار کرے و پارے کہ اگست 2025 نا ایسر اٹی وزیراعظم نابروک آ دورہ ءِ چین انا سرسہبی ءِ پک کننگ کن تیاری تا بناءِ کننگانے ۔