پاک فوج راجگال نا علاقہ ٹی دہشت گرد آتا برخلاف آپریشن خیبر فور انا بنائِ کرے، آپریشن نا مسخت سیم پار ساڑی داعش نا پاکستانی علاقہ غاتیٹی کارروائی ئِ توروئی ئِ
راولپنڈی۔ 16جولائی (اے پی پی) پاک فوج انا ترجمان میجر جنرل آصف غفور پارینے کہ پاک فوج راجگال نا علاقہ ٹی دہشت گرد آتا برخلاف آپریشن خیبر فور انا بنائِ کرینے، آپریشن نا مسخت سیم پار ساڑی داعش نا پاکستانی علاقہ غاتیٹی کارروائی ئِ توننگ نا ئِ۔ آئین و کانود نا شرف ہر پاکستانی نا فرض ئِ ، چین پاکستان اقتصادی راہداری ڈٹ آ مچ آ قوم و غٹ ادارہ غاک اسٹ ئُ، داڈٹ ئِ ہچ وڑاسے ٹی بے سہب مننگ کن ہلیپنہ، کلبھوشن یادیو آرمی چیف آن رحم نا خواست کرینے و اوڑآ زوت میرٹ و انصاف نارداٹ فیصلہ مریک، امریکی ایوان زیریں اٹی اتوک آ بل ہچ ئُ پابندی اس اف۔ پاکستان حقانی نیٹ ورک تون اوار غٹ دہشت گرد آتا برخلاف بے پرخ و امتیاز آپریشن کرینے، بھارت مقبوضہ کشمیر اٹی آجوئی نا تحریک اٹی ترندی اتنگ آ چکار ئِ اسہ پلو کننگ کن لین آف کنٹرول نا خلاف ورزی نا بنائِ کرینے۔ یک شنبے نا دے آئی ایس پی آر نا ڈائریکٹر جنرل میجر جنرل آصف غفور پریس کانفرنس آن تران کرسا پارے کہ پاک فوج یک شنبے آن راجگال نا علاقہ ٹی خیبر 4 آپریشن نا بنائِ کرینے ہرانا مسخت سیم پار ساڑی جنگوڑو تنظیم داعش نا پاکستانی علاقہ غاتیٹی کارروائی تے توننگ نا ئِ، مچ آ ملک اٹی آپریشن ردالفساد سرسہبی اٹ برجائِ، خیبر 4 آپریشن ہم ’ردالفساد‘ نا بشخ اسے۔ اوپارے کہ راجگال فاٹا نا مشکل انگا علاقہ ئِ دا 12ہزار 14ہزار فٹ بڑزی آٹی ئِ دا آپریشن ڈغاری حق انا رداٹ مشکل مریک۔ اوپارے کہ ساڑی ہی ٹی پارہ چنار آن ہرادہشت گرد ہلنگانے اونا داعش تون رابطہ نا شاہدی ملانے۔ داعلاقہ ٹی 500 خاہوت آباد ئسر ہرا حالیت آتا سوب ایلو جاگہ غاتیا ہنانو۔ اوپارے کہ دہشت گرد آک آسان ہدف آتے نشانہ جوڑ کننگ ئُ۔ پنجاب اٹی ردالفساد نا رداٹ کارروائی تیٹی 22دہشت گرد خلنگار۔ مچ آ ملک اٹی ردالفساد نا رداٹ جم وڑاٹ 46آپریشن کرے۔ اوپارے کہ کراچی ٹی دہشت گردی نا واقعہ غاتیٹی 98 درسد کمتی بسنے۔ ترجمان پاک فوج انا رداٹ آپریشن ضرب عضب 2014ءٹی بناءکننگا ہراٹی انٹیلی جنس بنداو آ 9 ہزار آن زیات آپریشن کننگا وخت اس کہ 46بھلو آپریشن مس ہراٹی چندی علاقہ غاتے کلیئر کرفنگا۔ اوپارے کہ اوغان سیم آ باڑ خلنگ نا کاریم نا بنائِ کرینے ہراڑے باڑ اتون اوار اوار پوسکن ئُ چوکی ہم اڈتننگانے ۔ اوپارے کہ بارڈر سوگو مریک تو دہشت گرد آتا ہن و برسلک، ننے تینا بارڈر ئِ سوگو جوڑ کروئی ئِ، اوغان سیم آ باڑ خلنگ نا مسخت بارڈر مینجمنٹ ئِ گچین و رکھوک جوڑ کننگ نا ئِ۔ بھارتی جاسوس کلبوشن یادیو سزانا برخلاف ایپلٹ کورٹ اٹی خواست کریسس ولے اودے مسترد کننگا داسہ او آرمی چیف آن رحم انا خواست کرینے دا خواست انا آرمی چیف جاچ ئِ ہلنگ ئِ داڑآ زوت میرٹ و انصاف نا گرج آتارداٹ فیصلہ مریک۔ اوپارے کہ ریمنڈ ڈیوس نا معاملہئِ چندی ادارہ غاک ہرارہ۔ اسہ سوج اسے نا ورندی ٹی اوپارے کہ پاکستان اٹی داعش نا وجود اف ولے دا اوغانستان اٹی منظم مننگ ئُ۔ سوشل میڈیا ٹی پاک فوج انا برخلاف پروپیگنڈہ نا بابت سوج انا ورندی ٹی اوپارے کہ ہربندغ ئِ رائے نا آجوئی ئِ ولے اسہ ہم محب وطن پاکستانی اس دُنو مہم اسے نا بشخ مننگ کپک، دامہم اٹی ہموبندغ آک اوار ئُ ہرامحب وطن افس، دُن انگا بندغ آک درملکی یا ایلو سازش آتا بشخ ئُ و ہرا عنصر آک داوڑ کننگ ئُ اوفتا برخلاف ملکی کانود نا رداٹ حکومت کارروائی کننگ ئِ ، اسہ سوج اسے نا ورندی ٹی او پارے کہ پاک فوج ئِ تیناملک اٹی اول امن ئِ قائم کروئی ئِ و اوغانستان اٹی امن نا پاکستان آن زیات ہچ ئُ ملک اسے نا خواہش مننگ کپک، اوغانستان ننا اسہ دوست و اسلامی ئُ ملک اسے، کیہی دہائی تیان داڑے بدامنی ئِ و داڑے استعداد کار و گورننس نا ویل ئِ، اگہ اوغانستان نافوج ہم پاکستان آنبار اہل مسکہ تو دا ویل متوکہ۔ ڈی جی آئی ایس پی آر پارے کہ سی پیک آ مچ آ قوم و ادارہ غاک اسٹ ئُ، اونا سیکورٹی نا زمواری پاک فوج انا ئِ و پاک فوج دا ڈٹ اکن ہرممکنہ سیکورٹی فراوان کیک، داڈٹ ئِ ہچ ئُ وڑاسے ٹی بے سہب مننگ کن ہلیپنہ۔ اسہ سوج اسے ناو رندی ٹی اوپارے کہ داپاننگ کہ پاکستان آرمی سازش اسے نا بشخ ئِ تو دانا ورندی تننگ ہی جوڑ مفک۔ اسہ سوج اسے نا ورندی ٹی او پارے کہ پاک فوج سیکورٹی و دفاع کن مچ آ قوم اتون اواری اٹ کڑدادا کننگ ئِ ، ہر پاکستانی شاری نا دافرض ئِ کہ او کانود نا شرف ئِ کے، جے آئی ٹی نا بابت اسہ سوج اسے ٹی اوپارے کہ داڑتون فوج انا براہ راست ہچ ئُ تعلق اس اف۔ جے آئی ٹی سپریم کورٹ جوڑ کرے، دامعاملہ سپریم کورٹ تون ئِ و اودے فیصلہ کروئی ئِ۔ اسہ سوج اسے نا ورندی ٹی اوپارے کہ پاک فوج پاکستان کن ئِ و دہشت گردی نا برخلاف او بے پرخ کارروائی کرینے، نن داجنگ اٹی دہشت گرد و اوفتا کمکار آتے شکست تسونن۔ اسہ سوج کہ پاکستان اٹی داعش نا اخس بندغ ئُ اونا پاننگ ئس کہ دا جنگ داخاطران مشکل ئِ کہ کس اسے نا پیشانی آ لکھوک اف کہ او دہشت گرد اسے۔ اسہ سوج اسے نا ورندی ٹی اوپارے کہ امریکی ایوان زیریں ٹی ہرابل پاس مسنے او اِرابھارت نواز باسک آک پیش کریر ولے دا بل ہچ ئُ پابندی اف داسہ دابل آ سیکرٹری دفاعئِ رائے تروئی ئِ و ولدا دا صدر نا کنڈآ کاہک۔
