اسلام آباد۔ 16جولائی (اے پی پی) بنجائی وزیر امور کشمیر و گلگت بلتستان چوہدری محمد برجیس طاہر پارینے کہ نواز شریف آ پانامہ لیکس کیس انا رداٹ خلوک آ غٹ دوبہ غاک غلط ثابت مریرہ و محمد نواز شریف ملک انا شونداری و شونہالی نا تینا وژن آ عملدرآمد ئِ برجاتخک۔ یک شنبے نا دے اسہ بیان اسے ٹی اوپارے کہ جے آئی ٹی باسک آتا جانبدارانہ رویہ نا سوب اوناجماعت ئِ باورئس کہ جے آئی ٹی انصاف نا غٹ گرج آتے پورو کننگ آن بیدس تینا رپورٹ ئِ محض مفروضہ غاتا بنداو آ ترتیب ایتک و جے آئی ٹی نا دُن انگا جانبدارانہ رویہ ئِ مون آ تخسا مسلم لیگ ن سپریم کورٹ تون دار داٹ رابطہ کریسس۔ اوپارے کہ حسین نواز نا عکس ئِ لیک کننگ کون آ واقعہ غاتیان داہیت انا یخین مسوسس کہ جے آئی ٹی تعصب آ مبنی فیصلہ غان بیدس ہچ اس کننگ کپک و اوکان پد قطری شہزادہ نا گواہی و بیان ئِ نظرانداز کرسا اسہ ہندن ئُ رپورٹ اس پیش کننگا ہراڑآن جاست وپاست کم و انتقامی کارروائی نا تسلسل زیات نظر بریک۔ بنجائی وزیر پارے کہ مسلم لیگ ن نا کانودی ٹیم سپریم کورٹ نا سماعت اٹی جے آئی ٹی نا دا جانبدارانہ و حق انا منافی رپورٹ نا اسہ اسہ لوز ئِ غلط ثابت کیک۔
