اسلام آباد۔14جولائی (اے پی پی) مزن وزیر محمد نواز زشریف ءَ گشتگ کہ 2013ءِ گچین کاری ءَ پد یکے بے بنیں مراگشے بندات کنگ بوتگ، چارسالانی تہا چے چے بوتگ اے وھدءَ من بیان کُت نہ کن اینت، نو اے سئمی اُرش کنگ بوھگءَ اِنت، ملک ءَ را یک رندے پدا پُشتءِ نیمگءَ دھکا دیئگ بوھگءَ اِنت، کش ءُ چیلیں جے آئی ٹی ءِ کشءُ چیلیں رپورٹ بدواھ آنی بے بنیں بھتانانی گرنچ اِنت، چارہزار تاکانی تہا کرپشن ءُ لُچی ٹگی ءِ کس بھتانءَ جت نہ کنت ، مئے ھاندان ءِ 62سالی بیپارءَ را ھیال ءُ لیکہ، سورس رپورٹ ، بھتان ءُ دروگانی بنیاتءَ وج کنگ بوتگ۔ مئے بازیں دیمروئی منصوبہ آنی تہا یک پئیءِ ھم لُچی ، کمیشن یا کک بیکس ءِ ھچ ٹپ نیست۔توانائی ءِ بازیں منصوبہ مئے دورءُ زمانگءَ بندات کنگ بوتگ اَنت ءُ انگت بوھگءَ اَنت۔ فوج ءِ گوما ناشرکاراناں پروش داتگ، کراچیءِ تہا امنءُ ایمنی جوڈ کتگ، بلوچستان ءَ پاکستانءِ راجی سوت توار کنگءَ اَنت، معیشت جوانیءَ دیمروئی کنگءَ اِنت۔ جمعہءِ روچءَ مسلم لیگ(ن) ءِ پارلیمانی پارٹی اجلاسءَ گوں تران کنانءَ مزن وزیر محمد نواز شریف ءَ گشتگ کہ کشءُ چیل جے آئی ٹی ءِ کش ءُ چیل رپورٹ مئے بدواھ آنی بے بنیں بھتانی گرنچ اِنت، اے رپورٹ ءِ تہا مئے گپءُ سوباتاں رد کنگءِ ھاترءَ ھچ وڈیں مھکمیں کاگد ءُ سبوت پیش کنگ نہ بوتگ۔ آئی ءَ گشتگ کہ تنا مئے ھاندان ءِ 62سالی بیپارءَ را مفروض ، سورس رپورٹ، بھتان ءُ دروگ ءِ سرءَ وج کنگ بوتگ۔ مزن وزیر ءَ گشتگ کہ انوگیں جاورھال پاکستان ءِ 70سالی راج دپتر ءِ یک عکس اِت۔ آئی ءَ گشتگ کہ جے آئی ٹی ءِ رپورٹ ءِ تہا اے وڑیں یک لبزءُ گوشتانک مان نیست کہ ایشیءَ چہ اشارہ بہ رسیت کہ نواز شریف ءَ کرپشن کتگ۔ آئی ءَ گشتگ مئے حکومت ءِ پنچیں دورءُ پنجاپ ءِ سروزیر شہباز شریف ءِ دوعرءَ اگاں مئے ھلاپءَ کموھم کرپشن ھم کیس اَست گڈا دیمءَ آرگ بہ بیت۔ مزن وزیر ءَ گشتگ کہ مشرفءِ آمریتءِ دیمءَ سرجہل نہ کتگ۔ آئیءَ گشتگ کہ من نہ تُرس اِتگءُ آمیس گسءِ بحالی ءِ ھاترءَ لانگ مارچ کتگ۔ آئیءَ گشتگ کہ منءَ رنج بیت کہ سیاسی مھکمی ءَ را نیزور کنگ بوھگءَ اِنت ءُ تکانسری پیداک کنوک ملکءَ را تاوان دیئگ ءَ اَنت۔ مزن وزیر ءَ گشتگ کہ سٹاک مارکیٹ54ہزار ءِ ریکارڈ ءَ سربوتگءُ اے جاورھالانی سوبءَ جہلءَ لونجان اِنت۔ آئی ءَ گشتگ کہ بلوچستان ءِ جاورھالاناں مہ گر ءُ دار کتگ کہ آھودہ مرچی پاکستانءِ بیرک ءِ سر چست اِنت، پاکستانءِ راجی سوت جنگ بوھگءَ اَنت۔ آئی ءَ گشتگ کہ پاکستان ءِ معیشت مرچی دیمروئی ءِ نیمگءَ رھادگ اِنت۔ آئی ءَ اپسوزءِ درشانی کتگ کہ آ ملک کہ مارا چہ پُشت بوتگ اَنت مرچی آ چہ مارا دیم ءَ اَنت۔ مزن وزیر ءَ گشتگ کہ 2013ءَ گشگ بوتگ کہ پاکستان سک ناگیگ اِنت ، پاکستان یک ناکامیں ریاست اِت ، چے مرزی اے وڈ کسے گشگءَ اِنت؟ آئیءَ گشتگ کہ اپسوز بیت کہ مئے محنت ءُ جدوجہدءَ پد ملکءَ رایک رندے پدا پُشتءَ دو ر دیئگ ءِ کوشست کنگ بوھگءَ اِنت۔
