اسلام آباد۔ 14جولائی (اے پی پی) السی جمہوریہ کرغستان نا سفیر ایرک بیشمبوف بنجائی وزیر موسمیاتی بدلی زاہد حامد تون اوڑدہی کرے۔ اوڑدہی ٹی بنجائی وزیر سفیر ئِ پارے کہ پاکستان اگست اٹی السی جمہوریہ کرغستان اٹی مروک آ انٹرنیشنل سنولیپر ڈکنز رویشن سمٹ اٹی پبی بشخ ہلیک۔ اومستی پارے کہ پاکستان اٹی برفانی چیتہ ئِ رکھوک کننگ کن گام گیج کننگ انگ ئِ و داٹی برفانی چیتا نا نسسل اٹی ودکی مننگ ئِ ۔ داوخت آ جنگل آتا انسپکٹر جنرل ناصر محمود سفیر ئِ پارے کہ ٹرافی ہنٹنگ پاکستان اٹی مارخور نا نسل ئِ رکھ کننگ کن اہم کڑد ادا کننگ ئِ انتئے کہ دا ہندی آ آبادی ئِ مالی فائدہ کن متوجوہ کیک۔ اومستی پارے کہ اکیڈیمہ ،قائد اعظم یونیورسٹی و آئی یو سی این پٹ وپول اٹی اختہ ئِ تانکہ برفانی چیتا نا چندی خدوخال بشمول اونا عادت آتے درستی راستی کننگے، داٹی ڈی این اے و ایکوسسٹم ہم اوار ئِ۔ ہڑتوم آ ملک آک داہیت آ امنا کریر کہ دا سمٹ ہڑتوم آ کنڈآتا تین پہ تینی تعلقداری تے مون آ دیک۔ سفیر دا ہیت آ زور شاغا کہ پاک چائنہ اقتصادی راہداری نا کمک اٹ ہڑتوم آ ملک آتے فائدہ ہرفنگ کن واپار ئِ مون آ دننگے۔ اوپارے کہ السی جمہوریہ کرغستان ون بیلٹ ون روڈ آ یخین تخک ہرا ہڑتوم آ ملک آتیٹی فاصلہ و واپار نا خڑچ ئِ کم کیک۔ اومستی پارے کہ کرغستان بارُن انگا میوہ ، سُو وغیرہ اوار ئِ، نا بنجائِ و برآمد آتیٹی ودکی نا خواہش مند ئِ ہرا ہڑتوم آملک آتیٹی واپاری تعلقداری تے ودفنگ اٹی کمکار ثابت مریک۔ اوڑدہی ٹی ایڈیشنل سیکرٹری عبدالطیف، جنگل آتا انسپکٹر جنرل ناصر محمود، پی آر او ظلِ ہما و سیکنڈ سیکرٹری و کمرشل قونصلر مسٹر اینڈ مسز کمالوف ئسک ہم ساڑی ئسر۔
