اسلام آباد۔ 13جولائی (اے پی پی) بنجائی وزیر شونداری و ڈٹ بندی احسن اقبال پارینے کہ اقتصادی راہداری ڈٹ مچ آ ملک انا ڈٹ ئِ ہراڑآن غٹ صوبہ غاک فائدہ ہرفرہ ، سی پیک ڈٹ انا کمک اٹ غٹ آن زیات زرکاری سندھ اٹی مریک، ڈٹ انا بابت من گھڑت پروپیگنڈا کروک آک پاکستان ئِ شون ہلسا ہُننگ خواپسہ۔ پشاور آن کراچی اسکان ریلوے نا نظام ئِ اپ گریڈ کننگک وخت اس کہ پشاور آن کراچی اسکان سگنل سسٹم ہم نصب کننگک، کراچی ۔ پشاورایم ایل ون ڈٹ 2018 ءنا ایسر اسکان پورو مریک، کراچی حیدرآباد موٹروے اگست 2018 ءاسکان پور و مریک، چین آن پاکستان اٹی کول پاور پلانٹ کن پوسکن ئُ مشینری اتنگانے ، مستین اٹی سیاسی نزوری نا سوب نسخان رسینگا۔ شونداری ڈٹ آتیٹی ننا ورناک ہم قربانی تسر۔ او پنچ شنبے نا دے نیشنل لاجسٹک سیل انا کنڈآن سی پیک لاجسٹکس انٹرنیشنل فورم آن تران کریکہ۔ احسن اقبال پارے کہ پاکستان مستین اٹی جیوپولیٹیکل گیم انا بشخ جوڑ مس ہرانا سوب نن شون ہلنگ کتون ۔ 20 می صدی سیاسی گروپ بندی تا صدی ئس ہراٹی جہانی کہول آ چندی گوازی کننگا و بدقسمتی اٹ پاکستان نا معیشت ہندا گوازی تا سوب آن شون ہلنگ کتو، 80 ءنا دہائی ٹی پاکستان نا فی کس کٹیا 200 ڈالر ئس و اینو 300 ڈالر ئِ وخت اس کہ چین نا فی کس کٹیا 300 ڈالر ئس و اینو 800 ڈالر اسکان رسینگانے۔
