بنجائی کابینہ نا دیوان، وزیراعظم محمد نواز شریف نا استیفہ تفننگ نا دوٹوک پڑو، کابینہ ناباسک آک زبردست خیرمقدم ئِ کرسا فیصلہ ئِ پک کریر
جے آئی ٹی نا رپورٹ ننا جندی کاروبارنا بارواٹی مفروضہ، دوبہ و بہتان تا مجموعہ اسے
اسلام آباد۔ 13جولائی (اے پی پی) وزیراعظم محمد نواز شریف استیفہ تفننگ نا دوٹوک پڑو ئِ کرینے ہرانا کابینہ باسک آک زبردست خیرمقدم ئِ کرسا اونا دافیصلہ ئِ پک کرینو۔ بنجائی کابینہ نا دیوان پنچ شنبے نا دے وزیراعظم محمد نواز شریف نا کماشی ٹی داڑے وزیراعظم آفس اٹی اڈ ہلک۔ وزیراعظم پارے کہ جمہوریت فروش سازشی ٹولہ نا پاننگ آ استیفہ ایتیو؟ اللہ نا فضل و کرم اٹ کنا ضمیر آ ہچ ئُ بھاریم اس اف۔ مسلم لیگ (ن) استیفہ نا خواست ئِ کروک آتا جم اٹنگاوونٹ آتیان زیات وونٹ ہلکونے۔ بنجائی کابینہ نا باسک آک وزیراعظم نا استیفہ تفننگ نا دوٹوک پڑو نا زبردست خیرمقدم ئِ کریر، باسک آک ڈیسک آتے خلسا فیصلہ ئِ پک کریر۔ وزیراعظم پارے کہ جے آئی ٹی نا رپورٹ ننا جندی کاروبار نا بارواٹی مفروضہ، دوبہ و بہتان نا مجموعہ اسے۔ ننا خاہوت سیاست آن ہچ ئُ کٹیا اس کتنے البتہ بھاز انگا گڑاتے گارکرینے، اوپارے کہ داڑے ارب آنا ڈٹ آک لگنگ ئُ ولے ہچ ئُ بدعنوانی اس ثابت متنے۔ وزیراعظم پارے کہ چارسال اٹی نن جوڑ جاڑ و شونداری نا انداخہ کاریم کرین ہراخس کہ اِرادہائی ٹی ہم متنے۔ اوپارے کہ ولداآن تہاری تے تینا بستی، تینا کارخانہ غاتا کنڈآ بننگ کن ہلیپنہ۔ اوپارے کہ جمہوریت فروش سازشی ٹولہ نا پاننگ آ استیفہ ایتیو؟ اللہ نا فضل وکرم اٹ کنا ضمیر آ ہچ ئُ بھاریم اس اف۔ 1985ءآن ہلیس اینو اسکان 32سال اٹی اسہ پیسہ اس نغڑدانن تو پابو، نم تودادوبہ اسکان اتنگ کپیرے۔ وزیراعظم پارے کہ وخت بننگ آ غٹ رازآک پاش مریرہ، ہمووخت زیات مُر اف۔ وزیراعظم پارے کہ جوڑ جاڑ و شونداری نا سفر ئِ ڈی ریل مننگ کن ہلیپنہ۔ پاکستان مستین اٹی داتماشہ غاتا بھاز بھلو قیمت اس ادا کرینے، داچرجوئی بایدے بند مرے۔
