کوئٹہ۔ 13جولائی (اے پی پی) کوئٹہ ٹی نادرست سلہہ بند بندغ آتا سم کاری آن ایس پی قائد آباد تون اوار 4کارندہ شہید وخت اس کہ ڈیور ٹھپی مس۔ پولیس نا رداٹ پنچ شنبے نا دے کوئٹہ نا علاقہ کلی دیبہ ٹی نادرست سلہہ بند بندغ آک اناگت پولیس نا گاڈی آ سم کاری کریر ہراٹی ایس پی قائد آباد مبارک شاہ تون اوار 4پولیس کارندہ سید فضل ربی، مدثر و عرفان ہمووخت آ دنیا ئِ الار وخت اس کہ ڈیور احمد اللہ ٹھپی مس۔ سم کاری نا واقعہ نا احوال ملنگ تون ہی پولیس و فرنٹیئر کور نا بھلو نفری اس موقع غا سرمس لاش و ٹھپی ئِ دمدستی وڑاٹ سول ہسپتال کوئٹہ غا سرکننگا۔ ایف سی و پولیس علاقہ ئِ گھیڑ اٹی ہلسا دوبہ دارآتا دزگیری کن سرچ آپریشن نا بنائِ کرینو۔
