وزیر مملکت اطلاعات و نشریات مریم اورنگزیب نا ایم این اے دانیال عزیز تون اوار پریس کانفرنس آن تران

اسلام آباد۔ 12جولائی (اے پی پی) وزیر مملکت اطلاعات و نشریات مریم اورنگزیب پارینے کہ 256پنہ غاتیا تالان جے آئی ٹی رپورٹ تینٹ داہیت آ مہر ثبت کرینے کہ نواز شریف نا پنچ ادوار حکومت اٹی ریاست نا اسہ پیسہ نا کرپشن ، خڑد و برد یا کمیشن ہلنگ تنے، جے آئی ٹی رپورٹ دروغ انا پلندہ اسے داڑآن اومیت، اندیشہ ، خدشہ و گمان نا لوز ئِ کشنگے تو دا محض خیال آتا مجموعہ اس سلک، کس اسے دورغ تڑوک و فریبی پاننگ نا موکل جے آئی ٹی ئِ دیر تس؟ جے آئی ٹی ہراکانود نا رداٹ کس اسے دروغ تڑ پارے؟ شریف خاہوت نا وکیل بروک آ ہفتہ سماعت نا وخت آ جے آئی ٹی نا رپورٹ ئِ چیلنج کرسا خلوک آ ہر دوبہ نا ورندی ئِ ایتک، پاننگے کہ دا 13سوج آتا ورندی ہراڑے کن ئِ ہراڑکن جے آئی ٹی جوڑ کننگاسس، جے آئی ٹی رپورٹ نا لوز آک تینٹ ہی بددیانتی و ننا گڑتی تے پک کننگ ئُ ، محمد نواز شریف اسہ نظریہ سے نا پن ئِ، وزیراعظم محمد نواز شریف نا برخلاف سازش نئے تو پوسکن ئُ و نئے ہی آخری، اونا برخلاف مروک آ سازش آک رنگ بدلیسا کرینو، داوار ہم سازش بے سہب مریک و سازش کروک آک بے نقاب مریرہ، کس اسے سوج اسے نا ورندی نا علم مفننگ نا مطلب دااف کہ او دروغ تڑنگ ئِ۔ اوچارشنبے نا دے پریس انفارمیشن ڈیپارٹمنٹ اٹی ایم این اے دانیال عزیز تون اوار پریس کانفرنس آن تران کریکہ۔ وزیر مملکت مریم اورنگزیب پارے کہ جے آئی ٹی رپورٹ بننگ آن پد دا شور چست مننگ ئِ کہ وزیراعظم استیفہ ایتے و داتاثر تننگ نا کوشست کننگ انگ ئِ کہ شاہد دا الس نا توار و خواہش ئِ، حقیقت تو دادے کہ دا ملک انا الس نواز شریف تون تفوک ئِ، و محمد نواز شریف ہم الس نا توار ئِ، اللہ تعالیٰ نا فضل وکرم و الس نا سوب وزیراعظم محمد نواز شریف مسٹ میکو وار وزیراعظم گچین مسنے۔ اوپارے کہ وزیراعظم محمد نواز شریف ئِ دورآمریت اٹی جلاوطن کننگا، اوڑآطیارہ کیس جوڑ کننگا اوکان پد ہراتم 2013ٹی مسلم لیگ (ن) نا حکومت جوڑ مس تو اسہ دروغ تڑوک ئُ بندغ اس دوبہ خلنگ نا بنائِ کرے، اول دھرنہ ون، برانز، دروغ انا دوبہ غاتا برسات، ولدا دھرنہ ٹو ، اسلام آباد ئِ لاک ڈاﺅن کننگا و داسہ دھرنہ تھری نا تیاری مننگ ئِ۔ اوپارے کہ جے آئی ٹی ئِ دیر اس دا موکل تسوسس کہ او 13سوج آتا ورندی ئِ پٹنگ آن بیدس وزیراعظم و شریف خاہوت نا ذاتی کاروبار، مارانا باوہ تون، ایڑ انا ایلم تون و پیرہ نا نواسہ تون کاروباری شریداری آ جانچ پڑتال کے، جے آئی ٹی تینٹ تینا رپورٹ اٹی نوشتہ کرینے کہ دا رپورٹ وزیراعظم و شریف خاہوت نا ذاتی کاروبار نا بابت ئِ۔ وزیراعظم و شریف خاہوت آن دا دروغ انا جے آئی ٹی رپورٹ ئِ چیلنج کننگ نا آئینی و کانودی حق ئِ ہچ گہس پُلنگ کپک، ہراوخت بڑزکو عدلیہ دا جے آئی ٹی رپورٹ ئِ ہریرہ و ننا اولیکو دے انا گڑتی تے ہریرہ تو ہرگڑا بے نقاب مریک۔ دا غٹ دروغ انا پلندہ سے ئُ ہرادے بڑزکو عدلیہ مسترد کیک۔ اوپارے کہ وزیراعظم آن استیفہ خواہوک آک جے آئی ٹی نا رپورٹ نا مخصوص بشخ انا تشریح ئِ کننگ ئُ، داسہ اسہ وار ولدا مخصوص بشخ آتا تشریح ئِ کرسا الس ئِ بے وقوف جوڑ کننگ انگ ئِ۔ وزیر مملکت مریم اورنگزیب پارے کہ شریف خاہوت نا جمع کرفوک دستاویز آتیا جے آئی ٹی تینا رپورٹ اٹی لکھک کہ مریم نواز ممکنہ وڑاٹ بینفیشل آنر مننگ کیک۔ اوپارے کہ سپریم کورٹ نا تہٹی جے آئی ٹی رپورٹ آ ننا کانودی مشیران لوز بہ لوز ورندی داخل کینہ۔ اوپارے کہ سوج دادے کہ داخہ کم وخت اٹی 254پنہ غاتا رپورٹ ئِ دیر اس جوڑ کرینے۔ اوپارے کہ وزیراعظم محمد نواز شریف آ انت کہ دوبہ اس لگک او غٹ دروغ ثابت مریرہ و انشاءاللہ الس 2018ءٹی اسہ وار ولدا محمد نواز شریف ئِ گیشتری ترسا وزیراعظم گچین کیرہ۔ اسہ سوج اسے نا ورندی ٹی وزیر مملکت مریم اورنگزیب پارے کہ محمد نواز شریف پارلیمنٹ آ جلہو کروک آ، پچ ٹنگوک آ یا پارلیمنٹ ئِ دُز و داڑیل پاروک آتیان اف، وزیراعظم محمد نواز شریف ہمیشہ پارلیمنٹ نا شرف ئِ کرے و پارلیمنٹ نا بالادستی کن جہد کرے۔ اوپارے کہ (اینو) پنچ شنبے نا دے آ بنجائی کابینہ نا دیوان مریک۔ اوپارے کہ اسہ بندغ اس گدرینگوک آ چار سال آن وزیراعظم نا استیفہ نا خواست ئِ کننگ ئِ ، ولے اودے ہچ اس دوبفک، او بندغ وخت اس ہم ملک انا وزیراعظم جوڑ مننگ کپک۔ اوپارے کہ ایلو سیاسی جماعت آک ہمیشہ ملک اٹی جمہوریت ئِ سوگوی تننگ کن تینا کڑد ئِ ادا کریر، داسہ ہم او مثبت کڑد ادا کیرہ۔ اوپارے کہ ننا گڑتی جے آئی ٹی ساڑی ئِ۔ جے آئی ٹی رپورٹ واضح تعصب ئِ ظاہر کیک۔ اوپارے کہ جے آئی ٹی ٹی دستاویز آتیٹی جنریٹ کننگا پروکیور آخا۔ اوپارے کہ الس نا تقدیر سازشی عنصر آتے ٹھیکہ ٹی تننگ مفک، الس 2018 ءٹی اسہ وار ولدا نواز شریف ئِ وونٹ انا طاقت اٹ گچین کیک۔ ایم این اے دانیال عزیز پارے کہ جے آئی ٹی نا رپورٹ بے پورو ئِ، رپورٹ ئِ پورو پارسا عدالت عظمیٰ ئِ مس گائیڈ کننگانے۔ اوپارے کہ جے آئی ٹی رپورٹ اٹی ہرا ہرا ملک آتے دستاویز دوئی کننگ کن چھٹی نوشتہ کننگانے اوفتیان 20 درسد نا ورندی بسنے۔ اوپارے کہ مستین اٹی قومی سلامتی نا ویل آ ویڈیو لنک، اُراتے غٹ جیل قرارترسا تو بیانات ہلنگا ولے دا جے آئی ٹی تینا جاست پاست اٹی پوسکن ئُ روایت اسے نا بنداو ئِ تخانے۔ اوپارے کہ وزیراعظم محمد نواز شریف نا ہچ ئُ آف شور کمپنی اس اف و نئے کمپنی سے آن آمدن دوئی کیک۔