نن عدالت آتا شرف ئِ کروک ئُ بندغ اُن و عدالت انت کہ فیصلہ اس کیک نن اودے امنا کینہ
اسلام آباد۔ 12جولائی (اے پی پی) بنجائی وزیر دفاعی پیداوار رانا تنویر حسین پارینے کہ نن عدالت آتا شرف ئِ کروک ئُ بندغ اُن و عدالت انت کہ فیصلہ اس کیک نن اودے امنا کینہ و نن جے آئی ٹی نا رپورٹ ئِ چیلنج ہم کینہ ۔ پاکستان مسلم لیگ (ن) ئِ انت کہ الس مینڈیٹ اس تس و ااونا حکومت بس تو گڑاس حلقہ غاتیان وخت اس ہم داہضم متو۔ داوخت ہم پاکستان مسلم لیگ (ن) نا جمہوری حکومت نا برخلاف چمب مننگ ئِ ہراغٹ ئِ صفا نظر ہم بننگ ئِ۔ داخیال آتا درشانی ئِ او چارشنبے نا دے اسہ نجی ٹی وی چینل اسے تون ہیت وگپ کرسا کرے۔ اوپارے کہ پاکستان نا الس وزیراعظم محمد نواز شریف ئِ مینڈیٹ تسنے و وزیراعظم پاکستان نا شونداری و شونہالی کن دے و نن کوشست کننگ ئِ و ملک مون آ ہِننگ ئِ۔ اوپارے کہ مسلم لیگ (ن) 2013ءٹی ہراتم حکومت ئِ سنبھالا تو پاکستان نا معاشی لحاظ آن دیوالیہ مننگ نا ہیت کننگاکہ ولے وزیراعظم محمد نواز شریف نا موثر کارآمد پالیسی تا ہی نتیجہ ئِ کہ اینو ملکی معیشت دے پہ دے سوگو مرسا ہِننگ ئِ ہرانا اعتراف ئِ جہانی ادارہ غاک ہم کننگ ئُ۔ اوپارے کہ ملک اٹی ہراتم ہم پاکستان مسلم لیگ (ن) نا حکومت بسنے ملک و قوم شون ہلکونے و ننا ساڑی آ 4سالہ دور حکومت ہم داہیت انا گواہ ئِ کہ اخس کہ شون دا 4سال اٹی مس گدرینگوک آ کیہی سال آتیٹی ہم متنے۔ اوپارے کہ ننا سروک السی خذمت نا سیاست آ یخین تخک ہنداخاطران نن السی عدالت اٹی ہِننگ نا ہیت ئِ کینہ و الس ہی غٹ آن گچین جج ئِ او بروک آ گچین کاری تیٹی ہم دیر ئِ چار گچین کننگ کیرہ۔
