صدر مملکت ممنون حسین نا دود آن تران

جیل آتا نظام اٹی اصلاح المی ئِ، اخلاقی تربیت نا کمک اٹ جیل آتیٹی بندی تے راج انا کارآمد بشخ ہم جوڑ کننگ مریک
اسلام آباد۔ 12جولائی (اے پی پی) صدر مملکت ممنون حسین پارینے کہ بندی تا گچینی کن اخلاقی و ذہنی تربیت نا کمک اٹ نئے بیرہ ڈوہ تا مون ئِ توننگ ممکن مریک بلکن جیل آتیٹی بندی تے راج انا کارآمد بشخ ہم جوڑ کننگ مریک، داپس منظر اٹی جیل آتا نظام اٹی اصلاح المی ئِ۔ داہیت ئِ او چارشنبے نا دے بنجائی محتسب سیکرٹریٹ نا کنڈآن جیل آتیٹی اصلاح کن مرتب کروک آ رپورٹ ئِ پیش کننگ نا وخت آ پارے۔ داوخت آ بنجائی محتسب محمد سلمان فاروقی آن بیدس پنی شاری، چاہندار تعلیم و جان جوڑی و ایلو خلقت نا بھلو کچ اس ساڑی ئسروخت اس کہ مخیر خواجہ غاک جیل آتیٹی اصلاحات و بندی تے آسراتی فراوان کننگ کن عطیہ غاتا ہم پڑوئِ کریر۔ صدر مملکت داوخت آ پارے کہ اسلامی تعلیم آتا روشنی ٹی ہی جدید دنیا ٹی قیدوبند انا مسخت آتیٹی اصلاحات مس و قید خانہ غاتے مرکز اصلاحات نا وڑاٹ درستی راستی کرفنگا۔ اوپارے کہ سزائے قید انا مسخت ہی دادے کہ ہرا دوبہ دار یا ڈوہدار اسہ وار جیل آ سرمرے ، گچین سلوک و گچین تربیت نا کمک اٹ اونا زند انا مسخت بدل مرے۔ اوپارے کہ سیاسی کارندہ نا حیثیت اٹ اوتینٹ ہم جیل انا آزموندہ غان گدرینگانے و بندی تا حالیت زار نا ذاتی وڑاٹ مشاہدہ ئِ کننگ آن پد دانتیجہ غاسرمسنے کہ جیل خانہ جات نا ساڑی آ چاگڑد اٹی بندی تا اصلاح ممکن اف انتئے کہ جیل آ ہِننگ آن پد جسمانی ڈکھ آتیان بیدس اوفتا عزت نفس و روح آ ہراگھاﺅلگک ، او اوفتا نفسیات ئِ پین پیچیدہ جوڑ کیرہ ہراٹی اوفتے ٹی بیرہ تینا دشمن آن ہی آخا بلکن مچ آ راج آن انتقام ہلنگ نا جوزہ ودی مریک ، دُن انگا سزا ہراکاریم نا ہراٹی آبادی نا اسہ خاص ئُ تپہ اس راج انا بنجائی دنگ آن کاٹنگسا اسہ ناپسندیدہ ئُ دنیا سے نا باسی جوڑ مرے و انسانیت ئِ فائدہ تننگ آن بیدس اذیت و تکلیف اٹی ودکی نا ذریعہ جوڑ مرے۔ داوخت آ بنجائی محتسب محمد سلمان فاروقی، جیل اصلاحات کمیٹی نا سروک اعجاز احمد قریشی، مسکوہی سیکرٹری اطلاعات سید انور محمود، چیئرمین ہیومن ڈویلپمنٹ سینیٹر رزینہ عالم خان، ہائر ایجوکیشن کمیشن نا چیئرمین ڈاکٹر مختار احمد، علامہ اقبال اوپن یونیورسٹی نا وائس چانسلر ڈاکٹر شاہد صدیقی، کامسیٹس نا ایگزیکٹو ڈائریکٹر ڈاکٹر ایس ایم جنید زیدی، پنی صنعت کار سردار یاسین ملک، پاکستان سویٹ ہوم نا سروک زمرد خان و نیشنل بک فاﺅنڈیشن نا سروک ڈاکٹر انعام الحق جاوید آن بیدس راجی کارندہ و صنعت کار آک بھلو کچ اسے ٹی ساڑی ئسر۔