اسلام آباد۔ 12جولائی (اے پی پی) قائد ایوان سینیٹ سینیٹر راجہ محمد ظفرالحق تون پاکستان اٹی تعینات بنگلہ دیش نا ہائی کمشنر طارق احسن پارلیمنٹ ہاﺅس اٹی اوڑدہی کرسا پاکستان نا الس و حکومت کن بنگلہ دیش نا حکومت و الس نا کنڈآن نیک است خواہی تا درشانی ئِ کرے و قائد ایوان سینیٹ ئِ بنگلہ دیش نا معاشی و سیاسی شونداری نا بارواٹی سرجم آتیان معلومدار کرے۔ طارق احسن اوڑدہی ٹی سینیٹر راجہ محمد ظفرالحق تون پاک۔چین اقتصادی راہداری نا بابت پاکستان نا معاشی شونداری نا ستائِ کرے و پارے کہ وزیراعظم پاکستان محمد نواز شریف نا گچین حکمت عملی نا سوب پاکستان شنگھائی کارپوریشن تنظیم نا باسک جوڑ مس ہراڑآ سینیٹر راجہ محمد ظفرالحق بنگلہ دیش نا پاکستان تون برادرانہ جوزہ غاتیا منت واری ئِ ادا کرسا ہڑتوم آ ملک آتا تین پہ تینی تعلقداری تیٹی پین گچینی اتنگ آ زور شاغا۔ بنگلہ دیش نا ہائی کمشنر بنگلہ دیشی حکومت و الس نا کنڈآن وزیراعظم پاکستان و پاکستانی الس کن نیک است خواہی تا کلہو ئِ ترسا پاکستان نا دہشت گردی نا برخلاف چست کروک آ گام گیج آتا ستائِ کرے۔ طارق احسن سلاہ تس کہ ہڑتوم آ ملک آتا نیام اٹ تین پہ تینی تعلقداری ئِ پین مون آ دننگ نا بابت پارلیمانی فرینڈ شپ گروپ اس جوڑ کننگے۔
